Daunt Books

Daunt Books is 'n onafhanklike Londense boekwinkelketting wat in 1990 deur die sakeman en vroeëre beleggingsbankier James Daunt (* 1963) gestig is en tans as een van die Britse hoofstad se leidende spesialiste vir reisliteratuur bekendstaan - met 'n beraamde omset van meer as tien miljoen £ per jaar. Daunt Books se 40 000 beskikbare boektitels word tradisioneel volgens lande gesorteer, ongeag die genre waarin hulle val.

Daunt Books se hoofwinkel in Marylebone High Street, wat oorspronklik in 1910 vir die antikwariese boekwinkel Francis Edwards gebou is, staan bekend vir sy Edwardiaanse interieur met lang eikegalerye, 'n groot boogvenster en dakvensters - en sy boekrakke wat tot teen die plafon staan. Naas die hoofwinkel in Marylebone is daar filiaalwinkels in Chelsea, Holland Park, Hampstead, Belsize Park en Cheapside.

In 2010 het Daunt Books sy eie uitgewerytak, Daunt Books Publishing, in die lewe geroep wat werke van leidende internasionale outeurs publiseer.

Eksterne skakels

• Amptelike webtuiste