David Miscavige
Voorsitter van die Raad van die Religieuse Tegnologiesentrum (RTC) & Kerkhoof van Sciëntologie
Kaptein van die Sea Org


Gebore
30 April 1960
in Bucks County naby Philadelphia, VSA


Eggenote
Michele ("Shelly") Miscavige


Amptelike webtuiste
davidmiscavige.org

David Miscavige ([ˌmɪsˈkævədʒ], * 30 April 1960 in Bucks County, net buite Philadelphia, Pennsilvanië, VSA) is die hoof van die Kerk van Sciëntologie. Sy amptelike titel is Voorsitter van die Raad van die Religieuse Tegnologiesentrum (Chairman of the Board of the Religious Technology Center (RTC), 'n instelling binne die Kerk se administratiewe strukture wat in Mei 1982 gevestig is om die handelsmerke en kopieregte van Dianetics (Dianetiek) en Scientology (Sciëntologie) te beskerm en beheer. Miscavige dien as godsdienstige leier van Sciëntologie.[1]

Reeds in sy tienerjare het Miscavige 'n adjunk-posisie as Commodore's messenger beklee en nou saamgewerk met die kerkstigter L. Ron Hubbard (1911–1986). In die vroeë 1980's was hy een van die Kerk se leidende persoonlikhede en is in 1987 benoem as Voorsitter van die Raad van die RTC.

Miscavige se grootste prestasies as kerkleier was die erkenning van die Kerk van Sciëntologie as organisasie sonder winsoogmerk deur die federale Amerikaanse Inkomstediens Internal Revenue Service (IRS), 'n status wat belastingvryheid waarborg; die publikasie van hersiene uitgawes van L. Ron Hubbard se werke; en die verwesenliking van 'n program waarvolgens plaaslike kerkgemeentes van nuwe of herontwerpte kerkgeboue en geriewe voorsien is. 'n Volledig digitale uitgewery, wat danksy die inisiatief van David Miscavige gevestig is, voorsien kerkgemeentes en belangstellende lede van die publiek van publikasies en digitale media soos DVD en Blu-ray.

Toe die Kerk van Sciëntologie op 12 Maart 2018 die Scientology Network, 'n DIRECTV-uitsaai- en OTT-videostroomdiens geloods het, het David Miscavige, wat andersins selde 'n draai voor die kamera maak, self as aanbieder opgetree. Die netwerk se programinhoud word deur Scientology Media Productions (SMP) in Hollywood, Los Angeles vervaardig, 'n fasiliteit wat in Mei 2016 gestig is. SMP, een van die modernste digitale ateljees ter wêreld, word in 'n gerenoveerde historiese rolprentateljee-kompleks van 1912 gehuisves. Sy deure staan oop vir ander denominasies en weldadigheidsorganisasies.[2]

Lewe wysig

David Miscavige is op 30 April 1960 saam met sy tweelingsuster Denise in die Pennsilvaniese distrik Bucks County, net buite die metropool Philadelphia, in 'n Pools-Italiaanse gesin gebore. Hul ouers, Ron en Loretta Miscavige, was Rooms-Katoliek. Miscavige het in Willingboro Township in New Jersey grootgeword en het die hoërskool in Marple Newtown bygewoon. As kind het Miscavige aan asma en swaar allergieë gely. Nadat Ron Miscavige begin het om in Sciëntologie belang te stel, het hy sy seun na 'n Dianetiek-sentrum geneem. Volgens vader en seun het 'n Dianetiek-sessie van 45 minute David se genesing bewerkstellig.

In 1971 het die Miscavige-gesin by die Kerk van Sciëntologie aangesluit en hulle vervolgens in East Grinstead, Engeland gevestig waar die kerk se destydse hoofkwartier, Saint Hill Manor, geleë was. Ron Miscavige het sy bande met die Kerk van Sciëntologie in 2012 verbreek en bly met sy tweede vrou Becky, 'n vroeëre Playboy-klub-kelnerin, in Wisconsin. 'n Boek wat Ron Miscavige oor sy seun gepubliseer het, is deur die media as "onthullingsverhaal" gevier, terwyl David Miscavige sy pa - 'n professionele trompetspeler - daarvan beskuldig dat hy met sy naam geld probeer maak.[3] Fotomateriaal, wat deur die kerk gepubliseer is, laat Miscavige Sr. se stellings - onder meer sy beweerde "vlug" uit die kerk se Sea Org - twyfelagtig lyk.

Verwysings wysig