Deutsche Luft-Reederei
Deutsche Luft-Reederei (D.L.R.) was 'n Duitse lugredery wat in Desember 1917 gestig is en in 1919 begin het om diens te lewer.
Geskiedenis
wysig
Die naam beteken "Duitse Lugredery". D.L.R. is in 1923 as Aero Lloyd AG herorganiseer. In 1926 het die Duitse regering die lugredery gedwing om met Junkers Luftverkehr te versmelt om Deutsche Luft Hansa, die nasionale lugdredery van die Weimar Republiek, te vorm. Die lugredery se logo was 'n gestileerde kraanvoël, ontwerp deur professor Otto Firle. Dit is in 1926 deur Deutsche Luft Hansa aanvaar en weer deur die nuwe lugredery Lufthansa in 1953.[1]
Die AEG-maatskappy, 'n groot vervaardiger van elektriese toerusting, het gedurende die Eerste Wêreldoorlog vliegtuie vir die militêre magte begin bou. Om volgehoue vraag na hierdie nuwe produk na die einde van die oorlog te verseker, het die maatskappy 'n kommersiële lugredery, die D.L.R, begin. Walther Rathenau, voorsitter van die raad van AEG, was die dryfkrag agter die lugredery. Ten spyte van regeringsubsidies was die lugredery nie winsgewend nie en in 1923 het AEG die D.L.R. herorganiseer en sy bates en operasies na 'n nuwe lugredery, Deutscher Aero-Lloyd, oorgedra. Dit was 'n gesamentlike onderneming van AEG, HAPAG, Luftschiffbau Zeppelin, Deutsche Bank en Dornier Metallbauten.
D.L.R. was die eerste Duitse lugredery om swaarder-as-lug-vliegtuie te gebruik. DELAG was die eerste lugredery ter wêreld, maar het ligter-as-lug-lugskepe wat deur die Zeppelin-maatskappy gemaak is, bedryf. Soos baie ander vroeë Europese lugrederye het D.L.R. voormalige militêre vliegtuie uit die Eerste Wêreldoorlog, o.m. die AEG J.II en LVG C.VI, bedryf. Aanvanklik het alle passasiers in oop kajuite gevlieg; daarna is sommige vliegtuie aangepas om twee of drie passasiers in 'n geslote kajuit te akkommodeer.
Die eerste D.L.R.-vlug was op 5 Februarie 1919 en het pos en koerante van Berlyn af na Weimar vervoer. Die lugredery het die volgende maand begin om passasiers te vervoer. Meer bestemmings, insluitende Hamburg en Hannover, is bygevoeg. In sy eerste jaar, 1919, het die lugredery gereeld geskeduleerde vlugte op roetes met 'n totale afstand van 1 580 km bedryf. Teen 1921 was die roetenetwerk meer as 3 000 km lank en het bestemmings in Nederland, Skandinawië en die Baltiese Republieke ingesluit.[2]
In 1919 was D.L.R. een van die stigterslede van die Internasionale Lugverkeervereniging, die voorganger van IATA.[3]
In 1920 het D.L.R. 2 665 passasiers vervoer, en in 1921 was dit 8 341.[4] Van 1919 tot 1921 was daar geen ernstige ongelukke of sterftes nie, net 'n paar liggewondes. Aangesien instrumentvlug nog nie ontwikkel was nie, was dit slegs moontlik om met goeie weer te vlieg. 92% van die geskeduleerde vlugte in 1919 kon plaasgevind. In 1921 het hierdie koers tot 96% toegeneem.[5] Nietemin is die lugredery nie gedurende die wintermaande bedryf nie.
Verwysings
wysigBronne
wysig- Cooksley, Peter (September–Oktober 1996). "Celestial Coaches: Dornier's Record Breaking Komet and Merkur". Air Enthusiast (65): 20–24. ISSN 0143-5450.
- Wagner, Wolfgang (1987). Der Deutsche Luftverkehr - Die Pionierjahre 1919-1925. Koblenz: Bernhard und Graefe Verlag. ISBN 3-7637-5274-9.