Volksblad

(Aangestuur vanaf Die Volksblad)
Volksblad se hoofkantoor in Bloemfontein.

Volksblad is 'n Afrikaanse, Suid-Afrikaanse koerant wat in die Vrystaat en Noord-Kaap versprei word. Dit is die oudste Afrikaanstalige dagblad in die land. Sy hoofkantoor is in Bloemfontein en die uitgewer is Media24.

Hoewel die koerant, vergeleke met Die Burger en Beeld 'n beskeie sirkulasie van 14 701 eksemplare per dag het (tweede kwartaal 2015), is die markpenetrasie onder Afrikaanssprekendes in die ylbevolkte provinsies Noord-Kaap en Vrystaat groot.

GeskiedenisWysig

Die geskiedenis van Volksblad begin op 18 November 1904, toe die Nederlandse drukker Hendrik de Graaff op Potchefstroom die Nederlandse weekblad "Het Westen" stig. Die blad spits hom toe op die belange en die ontwikkeling van die Afrikanerbevolking in die voormalige Boererepublieke Oranje-Vrystaat en Transvaal, wat swaar in die Tweede Vryheidsoorlog (1899–1902) gely het. In Maart 1915 word die nasionalistiese blad herdoop tot Het Volksblad en in 1916 verskuif sy hoofkantoor na Bloemfontein. In 1917 verander die naam weer, na Die Volksblad, en begin die blad om in Afrikaans te skryf. In 1925 word Die Volksblad 'n dagblad.

Op 20 April 2001 word die "Die" voor die naam amptelik geskrap en word die koerant kort en kragtig Volksblad.

Sedert die jare negentig begin Volksblad sy fokus verbreed om ook ander bevolkingsgroepe as sy tradisionele wit leserskorps in te sluit.

Die koerant het in 2004 sy eeufees gevier, met onder meer die publikasie van die boek ’n Lewe van sy eie – die biografie van Volksblad.

Die redakteurs van die blad, onder al sy name, voorheen en tans, was en is:

  • Hendrik de Graaf (stigter-eienaar, 1904 – 1917)
  • Paul G. Das (1904 – 1905)
  • Adam Boshoff (1905 – 1907)
  • B.G. Versélewel de Witt Hamer (1907 – 1909)
  • D.P. du Toit (1909 – 1914)
  • J. H. Malan (1914 – 1916)
  • dr. H.G. Viljoen (1916)
  • dr. J.F.W. Grosskopf (1917 – 1919)
  • J.H. Malan (waarnemende redakteur, 1919 – 1921)
  • dr. J.G. Conradie (1921)
  • dr. Reinard G. Kottich (1921 – 1922)
  • A.J. Werth (1922 – 1925)
  • dr. A.J.R. van Rhijn (1925 – 1948)
  • dr. Otto du Plessis (1948)
  • Hubert Coetzee (1949 – 1957)
  • Hugo Dreyer (1958 – 1970)
  • dr. Bart Zaaiman (1970 – 1980)
  • Hennie van Deventer (1980 – 1992)
  • Johan de Wet (1992 – 1994)
  • Paul Marais (1994 – 1999)
  • Jonathan Crowther (1999 – 2009)
  • Ainsley Moos ( 2010 – 2012)
  • Johanna van Eeden (2012 – 2014)
  • Gert Coetzee (2015 – tans)

Sien ookWysig

Eksterne skakelsWysig

BronWysig