Het Volksblad

Het Volksblad was ’n Nederlandstalige koerant wat in die tweede helfte van die 19de eeu 30 jaar lank deur B.J. van de Sandt de Villiers in Kaapstad uitgegee is (vir die latere Afrikaanse dagblad, sien Volksblad).

Van de Sandt de Villiers het die koerant die eerste maal in 1849 gepubliseer, maar dit het net 'n jaar lank bestaan. In 1856 laat hy die koerant herleef. In die stryd tussen die Liberale en Ortodokse Party het die koerant die Liberale ondersteun en vinnig vooruitgang gemaak sodat dit spoedig drie keer, pleks van een keer, per week verskyn het.

Die koerant het gestrewe na samewerking van albei "kolinierasse" (Nederlands- en Engelssprekend) ten behoewe van hulle Suid-Afrikaanse vaderland en van hulself as "heersende volk". Hoofartikels is onder meer deur prof. John Noble en adv. F.S. Watermeyer geskryf. Jan F. Celliers was die redakteur van 1863 tot 1872, toe hy Transvaal toe verhuis om die redaksie van De Volkstem te gaan lei. Sy opvolger was dr. J.W.G. van Oordt.

Baie van die vroegste stukke Afrikaans het in Het Volksblad verskyn, soos Boerenbrieven uit Fraserburg van Samuel Zwaartman (H.W.A. Cooper) en ook F.W. Reitz se verwerking van gedigte van Burns.

Het Volksblad het in 1886 gesluit.

Bronne

• (af) Swart, dr. M.J. (voorsitter redaksiekomitee). 1980. Afrikaanse kultuuralmanak. Aucklandpark: Federasie van Afrikaanse Kultuurvereniginge.