Donna Haraway

Donna J. Haraway (Denver, 6 September 1944) is 'n Amerikaanse feministiese sosioloog.

Donna Haraway
Donna Haraway in 2006
Gebore	Donna Jeanne Haraway 6 September 1944 (1944-09-06) Denver, Colorado
Nasionaliteit	Verenigde State
Beroep	Filosoof
Bekend vir	A Cyborg Manifesto: Science, Technology, and Socialist-Feminism in the Late Twentieth Century

Lewensbeskrywing

Donna Haraway het haar skoolloopbaan in katolieke skole voltooi. Sy studeer aan die Colorado-kollege en gradueer in 1966 in dierkunde en filosofie. Sy woon een jaar in Parys waar sy die filosofie van evolusie bestudeer. In 1972 behaal sy 'n PhD in biologie aan die Universiteit van Yale met 'n proefskrif oor die funksie van metafore by die vormgee van ondersoek in die ontwikkelingsbiologie in die 20ste eeu.

Haraway het op verskillende plekke klas gegee in vrouestudies en algemene wetenskappe; onder andere aan die Universiteit van Hawaï en die Johns Hopkins Universiteit. Sedert 1980 werk sy as dosent aan die Universiteit van Kalifornië in Santa Cruz waar sy hoogleraar in feministiese teorievorming en wetenskap is by die afdeling Geskiedenis van die Bewussyn.

In 2000 ontvang sy die J.D. Bernal Award vir haar hele oeuvre, die hoogste onderskeiding van die Society for Social Studies of Science.

Filosofie

Donna Haraway het op verskillende vakgebiede gefokus en dit is moontlik om haar te karakteriseer as 'n bioloog, filosoof en feminis. Haar multidissiplinêre essay waarmee sy bekend geword het, is A Cyborg Manifesto: Science, Technology, and Socialist-Feminism in the Late Twentieth Century (1985). Hier voer sy 'n pleidooi vir die afskaffing van die rigiede grense tussen mense en diere, organismes en masjiene, mans en vroue. Sy wil wel gesprekvoer oor die verskille tussen dié dinge, maar sy wil haarself nie verbind op die vlak van verpligte kategorieë nie. Dit doen sy deur 'n ironiese toekomsbeeld te skets van mense wat hulself ontwikkel as kuborge, deur die onvoldoende en gebrekkige funksies van hul liggame aan te vul met tegnologie. So gesien, stel Haraway, is mense in 'n sekere sin reeds al kuborge. Deur so die relevantheid van die grense tussen organisme en masjien te toon, gee sy tegelykertyd 'n beskrywing en 'n visioenêre toekomsbeeld van kuborge.

Werke

• Crystals, Fabrics and Fields: Metaphors of Organicism in Twentieth-Century Developmental Biology (Yale University Press, 1976)
• A Cyborg Manifesto (1985)
• Primate Visions: Gender, Race, and Nature in the World of Modern Science (Routledge, 1989)
• Simians, Cyborgs, and Women: The Reinvention of Nature (Routledge,1991)
• Modest_Witness@Second_Millennium.FemaleMan©_Meets_Oncomouse™ (Routledge, 1997)