Douglas Mitchell
Douglas Edgar Mitchell (1896 - 1988) was 'n Parlementslid van die Verenigde Party en administrateur van Natal.
Mitchell is in die distrik Port Shepstone gebore as die seun van Charles Henry Mitchell en ontvang sy opleiding aan die Weenen Country College. Hy trou op 3 Oktober 1925 met Mildred, die dogter van Stanley Hunt. Hulle het drie kinders gehad.
Politieke loopbaan
wysigHy is in 1948 as V.P.-lid vir die setel Natal-Suidkus verkies met 'n meerderheid van 3 903. In 1953 behou hy dieselfde setel met 'n meerderheid van 6 828 bo B.S. de Kock van die Nasionale Party en 87,6% van die uitgebragte stemme. Hy vaar selfs beter in 1958 teen 'n onafhanklike kandidaat, C.M. Hulley, toe hy 94,5% van die stemme kry en 'n meerderheid van 6 374. In 1961, twee jaar na die stigting van die Progressiewe Party uit 'n skeuring in die V.P., verenig Mitchell steeds in Natal-Suidkus 4 956 stemme op hom vergeleke met 2 367 vir die P.P.-kandidaat, L. Boyd.
In 1966 is die N.P. terug op die toneel met sy kandidaat, B.M. Thompson, wat 3 697 stemme kry vergeleke met 5 693 vir Mitchell. Die setel het van toe af net as "Suidkus" bekend gestaan. In 1970 word Mitchell die laaste keer daar verkies, met 'n meerderheid van 4 627 bo die N.P.-kandidaat, G.E. Tracy.
Mitchell was ook boer en algemene handelaar. Op 20 Februarie 1974 kondig die eerste minister, John Vorster, in die Parlement aan dat Mitchell vereer word met die Eerbewys vir Voortreflike Diens.