Wikipedia

Esposizione Universale di Roma

Esposizione Universale di Roma, kort EUR of Eur [ɛ:ur], Afrikaans: Wêreldtentoonstelling te Rome, is die naam van 'n nuwe stadskwartier wat tydens die fascistiese bewind in Italië vanaf 1938 in die suide van die hoofstad Rome ontstaan het. Hier sou volgens die plan van Italië se destydse leier of duce Benito Mussolini die wêreldtentoonstelling van 1942 as 'n «Olimpiade van Beskawings» (Olimpiade delle Civiltà) gehou word - onder meer om Italië se vooruitgang onder 'n fascistiese regering aan die wêreld te wys.

Q. XXXII Europa

EUR
Stadskwartier
Paleis van die Italiaanse beskawing (Palazzo della Civiltà Italiana)
Paleis van die Italiaanse beskawing
(Palazzo della Civiltà Italiana)
Q. XXXII Europa is in Italië
Q. XXXII Europa
Q. XXXII Europa
Koördinate: 41°49′52″N 12°28′10″O / 41.83111°N 12.46944°O / 41.83111; 12.46944
LandVlag van Italië Italië
Streek Latium
ProvinsieMetropolitane Stad Rome
Administratiewe distrikMunicipio Roma IX
Stigting1938
Oppervlak
 • Totaal4,7382 km2 (1,8 294 vk. myl)
Hoogte
0,19 m (,63,83 ft)
Bevolking
 • Totaal9 416
 • Digtheid1 987/km2 (5 150/vk. myl)
TydsoneUTC+1 (MET)
 • SomertydUTC+2 (MEST)

Amptelik is na die projek verwys as E42 (Esposizione 1942). Die wêreldtentoonstelling, wat oorspronklik in 1941 gehou sou word (maar uiteindelik weens Italië se toetreding tot die Tweede Wêreldoorlog gekanselleer is), is volgens Mussolini se wens na die volgende jaar verskuif om saam te val met die 20-jaarfees van sy fascistiese bewind. EUR het daarnaas deel uitgemaak van die fascistiese stadsbeplanning vir Rome waarvolgens die beboude stadsgebied in suidwestelike rigting en kuswaarts uitgebrei sou word, waarby EUR as nuwe moderne middestad sou dien. Hierdie planne is nooit verwesenlik nie, en so het ook talle projekte in EUR onvoltooi gebly. Eers ná die oorlog is sommige van hulle hervat en voltooi - naas 'n verskeidenheid naoorlogse geboue.

Sedert 1961 vorm EUR een van Rome se 35 stadskwartiere, as die Q. XXXII Europa, geleë in die 9de administratiewe distrik (Municipio Roma IX) waar dit baie funksies van 'n moderne sakekwartier vervul. Die beskikbaarheid van uitgestrekte onbeboude terreine maak van EUR 'n gewilde kwartier vir nuwe eiendomsontwikkelinge soos Eurosky, 'n moderne woonsteltoring met 28 verdiepings wat deur die argitek Franco Purini volgens die voorbeeld van Amerikaanse condominiums ontwerp is en in 2012 in Torrino, 'n woonkwartier wat aan EUR grens, voltooi is[1], en munisipale projekte soos Rome se nuwe Kongressentrum (Nuovo Centro Congressi di Roma / Rome Convention Center).

Geskiedenis wysig

 
Die oorspronklike plattegrond van E42
 
Palazzo della Civiltà Italiana, ontwerp as 'n moderne vierkante argitektoniese verwysing na die Colosseum (Colosseo quadrato) met vier identieke fasades en opgerig op die kwartier se hoogste punt
 
Uitsig oor die Palazzo della Civiltà Italiana (Paleis van die Italiaanse Beskawing), tans die hoofkwartier van die modehuis Fendi, vanuit Via Cristoforo Colombo
 
Banca Nazionale del Lavoro
 
Via Cristoforo Colombo, afdraaipad tot die snelweg
 
Die skaalmodelle van argaïese en antieke Rome in die tydperk van keiser Konstantyn die Grote (foto) is van die indrukwekkendste besienswaardighede in die Museum van die Romeinse Beskawing (Museo della Civiltà Romana)

Ná 'n fase van intensiewe beplanning het die argitek Marcello Piacentini (1881−1960) in 1938 die finale ontwerp vir EUR bekendgestel. Die projek se hoofdoelwit binne die bestek van fascistiese stadsbeplanning vir Rome was om die historiese middestad, die Centro storico, met die see naby Ostia verbind. Hiervoor is 'n nuwe hoofverkeersaar, die Via Cristoforo Colombo, gebou. 'n Spoorverbinding tussen Rome en Ostia is reeds in 1924 voltooi - as die belangrikste vervoerprojek van 'n stadsbeplanning waarin die ontsluiting van voorheen meer of min geïsoleerde kleiner nedersettings in die omgewing van Rome as residensiële voorstede vir pendelaars met werkplekke in Rome sentraal gestaan het. Hiervoor is veral nuwe busroetes geskep.[2]

EUR se plattegrond is ontleen aan die klassieke Romeinse model van stadsbeplanning met twee hoofare, die Cardo (meestal in noord-suidelike rigting aangelê) en die Decumanus (wat in wes-oostelike rigting loop), wat mekaar reghoekig sny. By die kruispunte van EUR se hoofare is monumentele fascistiese geboue opgerig wat deels deur Piacentini, deels deur ander argitekte ontwerp is. In teenstelling met ander wêreldtentoonstellingsterreine is alle argitektoniese projekte en uitstallingsgeriewe as permanente geboue beplan wat later die kern van 'n nuwe stadskwartier sou vorm.

Vir die ambisieuse projekte is van die mees gesofistikeerde boustyle en duurste boumateriale soos marmer en travertyn gebruik. In argitektoniese opsig het die ontwerpe vir E42 in 'n spanningsveld van twee boustyle ontstaan - die destyds oorheersende neo-klassieke Scuola Romana (met Marcello Piacentini as hoofverteenwoordiger) en die Italiaanse razionalismo (waarvan Adalberto Libera een van die bekendste voorstaanders was). Die laasgenoemde argitektoniese stroming het sy voorbeelde dikwels in die antieke Romeinse boukuns gevind, maar ook elemente van 'n vroeg-20ste eeuse metafisiese skilderstyl, die Pittura metafisica, getoon wat in Italië tussen 1910 en die 1920's gefloreer het.

Musea wysig

'n Aantal eersterangse musea is in EUR geleë wat vanweë hul ligging ver buite die historiese middestad kleiner besoekergetalle lok as ander besienswaardighede in Rome - die Museum van die Romeinse Beskawing (Museo della Civiltà Romana - tans ongelukkig gesluit vir renovasie[3]), die Nasionale Museum vir Prehistoriese Etnografie (Museo Nazionale Preistorico Etnografico), die Nasionale Museum van die Hoë Middeleeue (Museo Nazionale dell'Alto Medioevo) en die Nasionale Museum van Kunste en Volkskuns (Museo Nazionale delle Arti e Tradizioni Populari).

In September 2016 het die Italiaanse Departement van Kultuur en Toerisme (Ministero per i beni e le attività culturali e per il Turismo) se Direksie van Musea (Direzione generale Museo) die museumlandskap in EUR geherstruktureer en vier museale seksies in 'n nuwe kompleks, die Museum van Beskawings (Museo delle Civiltà), verenig.

Verwysings wysig

  1. ↑ Discover Eurosky Roma. Besoek op 12 April 2020
  2. ↑ Harald Bodenschatz: Städtebau für Mussolini. Auf dem Weg zu einem neuen Rom. 2de verkorte uitgawe. Berlin: DOM Publishers 2013, bl. 52
  3. ↑ Museo della Civiltà Romana: Chiuso il Museo... Besoek op 12 April 2020

Eksterne skakels wysig

Wiki-webtuistes
Media
Ontsluit van "https://af.wikipedia.org/w/index.php?title=Esposizione_Universale_di_Roma&oldid=2376454"