Eurasiatiese Unie
Die Eurasiatiese Unie (Russies: Евразийский Союз) is 'n politieke en ekonomiese unie van Eurasiatiese lande. Die lidlande is Wit-Rusland, Kasakstan, Kirgisië, Rusland, Tadjikistan[1][2][3] en kan ook ander lande in Europa en Asië, soos lande wat deel van die Sowjetunie was, insluit.
Die stigting van 'n Eurasiatiese Unie is in Oktober 2011 deur Rusland se eerste minister, Wladimir Poetin as teenvoeter vir die Europese Unie voorgetel.[3][4] Die idee vir so 'n unie is egter reeds in 1994 deur die president van Kasakstan, Noersoeltan Nazarbajef, in 'n toespraak in Moskou bepleit.
Op 18 November 2011 het die presidente van Wit-Rusland, Kasakstan en Rusland 'n ooreenkoms onderteken waarin hulle onderneem om die Eurasiatiese Unie in 2015 tot stand te bring.[5] Die ooreenkoms bevat onder andere 'n roetekaart vir toekomstige integrasie en die vestiging van 'n Eurasiatiese Kommissie (gemodelleer op die Europese Kommissie) en die Eurasiatiese Ekonomiese Ruimte, wat hul werksaamhede op 1 Januarie 2012 begin het.[5][6] Die ooreenkoms lê klem op ekonomiese integrasie en 'n toekomstige gemeenskaplike mark, en nie soseer op politieke integrasie nie.
Hierdie drie lande onderteken op 29 Mei 2014 'n ooreenkoms waarin hulle proklameer dat die Eurasiatiese Ekonomiese Unie amptelik op 1 Januarie 2015 in werking sal tree. Alhoewel president Poetin graag sou wou sien dat die unie ook militêre en politieke sake moet insluit, maak die ooreenkoms slegs vir ekonomiese samewerking voorsiening.
Die Verenigde State van Amerika het die stigting van die unie gekritiseer. Volgens hulle is die Eurasiatiese Unie 'n poging van die Russiese Federasie om weer 'n houvas op die voormalige Sowjetrepublieke te kry en die voormalige Sowjetunie in 'n ander vorm te laat herleef.
Verwysings
wysig- ↑ "Putin calls for the Eurasian Union". B92. RIA Novosti. 4 Oktober 2011. Geargiveer vanaf die oorspronklike op 6 Oktober 2011. Besoek op 4 Oktober 2011.
- ↑ "Putin calls for 'Eurasian Union' of ex-Soviet republics". BBC News (in Engels). 4 Oktober 2011. Geargiveer vanaf die oorspronklike op 22 Desember 2019. Besoek op 4 Oktober 2011.
- ↑ 3,0 3,1 Bryanski, Gleb (3 Oktober 2011). "Russia's Putin says wants to build "Eurasian Union"". Yahoo! News (in Engels). Reuters. Geargiveer vanaf die oorspronklike op 6 Oktober 2011. Besoek op 4 Oktober 2011.
- ↑ "Новый интеграционный проект для Евразии – будущее, которое рождается сегодня". Izvestia (in Russies). 3 Oktober 2011. Geargiveer vanaf die oorspronklike op 5 April 2017. Besoek op 4 Oktober 2011.
- ↑ 5,0 5,1 "Russia sees union with Belarus and Kazakhstan by 2015". BBC News (in Engels). 18 November 2011. Geargiveer vanaf die oorspronklike op 1 April 2020. Besoek op 19 November 2011.
- ↑ "Евразийские комиссары получат статус федеральных министров". Tut.By (in Russies). 17 November 2011. Geargiveer vanaf die oorspronklike op 9 Oktober 2019. Besoek op 19 November 2011.