Maak hoofkeuseskerm oop

Evert Snyman was 'n Afrikaanse radio-omroeper, stemkunstenaar, akteur en skrywer. Snyman was veral bekend as die voorleser en aanbieder van kinderprogramme op Radio Sonder Grense, asook vir sy kinderreeks, Die avonture van Stoffel die seekoeibulletjie. Hy was by verskeie vervolgverhale, dramas, en motorfiets-rubrieke betrokke en het ook talle dramas saam met sy vrou, Mari, geskryf.[1]

Evert Snyman
Gebore ~1955
Oorlede 25 September 2015
Nasionaliteit Suid-Afrika
Beroep Radio-omroeper, skrywer, akteur
Bekend vir Radioprogramme en kinderstories
Eerbewyse Artes-prys
Huweliksmaat Mari
Kind(ers) 2

Beknopte biografieWysig

Snyman, 'n seun van die Gereformeerde predikant ds. Ewert Snyman, begin sy loopbaan in 1976 as 'n akteur by die destydse Transvaalse Raad vir die Uitvoerende Kunste. Hy is twee jaar later lugmag toe, waar hy opvoedkundige programme vir KOLOT (die kollege vir opvoedkundige tegnologie) vervaardig het. Gedurende die tyd het hy in verskeie radiodramas en -reekse vir die destydse Afrikaanse Radiodiens en Springbokradio opgetree.

In 1982 sluit hy as voltydse omroeper en regisseur by die Afrikaanse Radiodiens aan. Twee jaar later begin hy om as 'n regisseur, akteur en draaiboekskrywer by Mimosafilms te werk.

Hy betree die vryskutmark in 1984, maar sluit in 1987 weer voltyds by die SAUK se Afrikaanse Radiodiens aan, waar hy 'n senior omroeper en regisseur was.

In 1994 ontvang hy 'n Artes-prys vir Beste Uitsaaier: Radiodienste wat in Engels en Afrikaans uitsaai.[2] In 2009 is hy deur die ATKV vir sy volgehoue bevordering van Afrikaans (toe reeds 33 jaar) vereer.

Snyman is in 2006 met 'n seldsame niersiekte gediagnoseer en moes gereeld dialise ondergaan. Hy het 'n nieroorplanting in 2007 gehad. Gedurende die tyd het hy 'n verder twee albums (volumes 4 en 5) van Die avonture van Stoffel die seekoeibulletjie geskryf en opgeneem.

Hy is op 25 September 2015, op 60-jarige ouderdom, oorlede.

VerwysingsWysig

Eksterne skakelsWysig