Ezrom Legae

Ezrom Legae (1938–1999) was 'n Suid-Afrikaanse beeldhouer en tekenaar. Hy is in 1938 in Vrededorp, Johannesburg, gebore. Hy het sy skoolopleiding eers aan die St. Cyprian-skool en daarna aan die Madibane-hoërskool ontvang, maar sy kunsopleiding aan later die Polly Street Kunssentrum onder die leiding van Cecil Skotnes, en sy assistent, Sydney Kumalo.

Ezrom Legae
Gebore	1938 Vrededorp, Johannesburg
Sterf	1999 Soweto, Johannesburg, Gauteng
Nasionaliteit	Suid-Afrika
Veld	Beeldhoukuns, tekening
Opleiding	St. Cyprian-skool, Madibane-hoërskool, Polly Street Kunssentrum in Johannesburg
Beïnvloed deur	Cecil Skotnes, Sydney Kumalo

Legae het as kind reeds talent in die kunste getoon en op skool was hy 'n geesdriftige tekenaar. Ná sy skoolopleiding het hy verskeie betrekkings beklee wat nie met die kuns verband gehou het nie. In dié stadium het sy ouer broer, Abner, egter by Skotnes kunsles geneem en Ezrom het hom by sy broer aangesluit. Tot in 1964, toe Legae Kumalo opgevolg het, het hy hoofsaaklik waterverfskilderye en sketse gemaak. Met die aanmoediging en tegniese bystand van Skotnes het Legae gou die medium van die beeldhoukuns bemeester.

Legae is in 1965 aan Egon Guenther voorgestel, wat onderneem het om as Legae se handelaar op te tree. Dit het Legae aangespoor om sy tegniek verder te ontwikkel en meer werke te maak. Tot in dié stadium het Legae se werk nog baie invloed van sowel Skotnes as Kumalo getoon. In 1970 het hy egter 'n studiereis na die VSA en dele van Europa onderneem. Dit het 'n groot uitwerking op sy werk gehad, en hy het finaal weggebreek van die Polly Street-idioom. Sy werk het meer individualisties en abstrak geword en hy het die kuns bemeester om sy tradisionele agtergrond deur middel van Westerse mediums en tegnieke weer te gee.

Die verwantskap tussen Ezrom Legae se teken- en beeldhouwerk is baie duidelik: Al sy figure, sowel in sy beeldhouwerk as in sy tekenwerk, word in abstrakte, geometriese vorms geplaas. Hy teken hoofsaaklik met houtskool en potlood. Die mens is sy gunsteling tema en hoewel die meeste van sy onderwerpe die mens in sy sosiale omstandighede uitbeeld, is Ezrom Legae nie 'n sosiale kommentator soos baie ander hedendaagse township-kunstenaars nie, maar hy beeld die universele lief en leed – en soms humor – van die mens se bestaan uit.

Ezrom Legae het sy eie ateljee in Soweto gehad waar hy tot sy dood in 1999 saam met sy familie gewoon het. Hy het al talle eenmanuitstallings aangebied en het verskeie toekennings vir sy kuns ontvang.

Bronnelys

• Wêreldspektrum, Vol. 17, 19, ISBN 0 908409 58 3