Fleet Street
Fleet Street is 'n straat in die City of London wat na die Fleet, Londen se grootste ondergrondse rivier, vernoem is. Tot met die 1980's was die uitgewerye, redaksiekantore en drukkerye van Britse nasionale dagblaaie hier gesetel en het rolperse die straat saans laat bewe. Vragmotors het miljoene pasgedrukte dagblaaie na stasies, lughawens of ander bestemmings vervoer.[1] Die eerste drukpers in Fleet Street is reeds teen die einde van die 15de eeu in bedryf gestel, en in 1702 het die eerste dagblad verskyn.
Tegnologiese vooruitgang en strukturele veranderinge in die koerantmark het die einde van Fleet Street as Britse koerantsentrum ingelui namate nuwe moderne drukaanlegte in stadsdele soos Wapping en Canary Wharf ontstaan het. Alhoewel die laaste oorblywende nuusagentskap, Reuters, sy kantore in 2005 gesluit en na Canary Wharf verskuif het, word die term Fleet Street steeds as 'n sinoniem vir die nasionale pers in die Verenigde Koninkryk gebruik.
Geskiedenis en ligging
wysig
Foto deur James Valentine
Blykbaar het die straat reeds in die 13de eeu as Fleet Street bekendgestaan, en daar is talle verwysings na Fleet Street in die vroeë 14de eeuse dokumente. Oorspronklik het Fleet Street die City of London as kommersiële sentrum met Westminster verbind waar belangrike politieke instellings geleë was. So weerspieël die straat se lengte die uitbreiding van die City gedurende die 14de eeu.
Aan die straat se oostelike einde het die Fleetrivier langs die middeleeuse stadsmuur van Londen gevloei, terwyl die Temple Bar aan Fleet Street se westelike einde die huidige grens tussen die City of London en die City of Westminster aandui. Vanaf Temple Bar loop die straat buite die stadgrens van Londen as The Strand in westelike rigting; in die ooste loop die roete verby Ludgate Circus en word hier, net soos die nabygeleë heuwel, Ludgate Hill genoem.
Die A4-pad het oorspronklik vanaf Ludgate Circus geloop waarby die hele Fleet Street deel uitgemaak het van dié pad. Vandag begin die pad egter by Holborn Circus, loop langs Fetter Lane en daarna langs die westelike gedeelte van Fleet Street en van daar verder na Westminster. Die naaste moltreinstasies is Temple, Chancery Lane en Blackfriars, naas die City Thameslink-treinstasie.
Godsdienstige instellings
wysigGedurende die hoë Middeleeue het leidende geestelikes hul Londense paleise in Fleet Street laat bou. So verwys straatname soos Peterborough Court of Salisbury Court na vroeëre biskoplike paleise, en naas instellings van die Tempelridders herinner Whitefriars Street aan die gelyknamige klooster waarvan die oorblyfsels besigtig kan word.
Tans het drie gemeentes hul kerkgeboue in Fleet Street: Temple Church, St Bride's Church (wat met die drukkersbedryf verbind word) en St. Dunstan-in-the-West wat as plaaslike parogiekerk en kerk van die Roemeens-Ortodokse gemeente dien.