St Bride's Church

St Bride's Church is 'n kerk in die City of London. Die huidige gebou in Fleet Street is deur die befaamde argitek Sir Christopher Wren in 1672 ontwerp, maar gedurende 'n reeks Duitse lugaanvalle op Londen in 1940, die sogenamde London Blitz, grotendeels deur 'n brand vernietig. Vanweë sy ligging in Fleet Street word die kerk tradisioneel verbind met die perswese en is daarna verwys as "Joernalistekerk". Dié verbintenis gaan egter verder terug in die geskiedenis.

St Bride's Church, gesien in 'n oostelike rigting vanuit die kerkskip, met die altaar in die agtergrond

'n Buiteaansig van St Bride's

Toe Engeland se eerste meesterdrukker, William Caxton (omstreeks 1422–1491), in 1476 vanuit Keulen, waar hy 'n opleiding in druktegniek deur Johannes Gutenberg ontvang het, na sy geboorteland teruggekeer het, het hy Engeland se eerste drukpers naby die Westminster-abdy ingerig. Caxton was egter ook 'n suksesvolle tekstielhandelaar, en die grootste deel van sy fortuin is in dié bedryf, en juis nie in die drukwese nie, verdien. Toe hy in 1491 oorlede is, het sy leerling Wynkyn de Worde († 1535) die Caxton-drukpers gekoop en – weens die gebrek aan 'n alternatiewe inkomstebron – pogings onderneem om van die drukwese 'n winsgewende bedryf te maak.

De Worde het Engeland se eerste drukpers met beweeglike letters langs St Bride's Church opgerig – in 'n buurt waar talle geestelikes woonagtig was wat as potensiële geletterde klante in aanmerking gekom het. Latere drukkers het sy voorbeeld gevolg sodat die buurt tot die spilpunt van Engeland se vroeë drukbedryf ontwikkel het. De Worde het sy laaste rusplek in St Bride's Church gevind.

Ná die Tweede Wêreldoorlog het dagbladuitgewers met hul skenkings bygedra tot die heropbou van St Bride's volgens Wren se oorspronklike ontwerp. Die kerkgebou is steeds 'n maklik herkenbare deel van Londen se stadsilhoeët. Met 'n hoogte van 226 voet of 69 meter is dit die tweede hoogste van Wren se kerkgeboue wat slegs deur die St. Paulus se katedraal oortref word.

Die kerk het sy naam aan twee instellings verleen wat met die geskiedenis van die pers, drukwese en tipografie verbind word:

• die St Bride Foundation en
• die St Bride-biblioteek wat deur dié stigting bedryf word en op 6 April 2016 heropen is nadat dit weens 'n tekort aan fondse deur sluiting bedreig is.

Eksterne skakels

• Wikimedia Commons het meer media in die kategorie St Bride's Church.
• (en) Amptelike webwerf