Flip Buys

Philippus Jacobus Wilhelmus (Flip) Buys is die voorsitter van die Solidariteit Beweging. Hy is op 1 Maart 1963 op Delareyville in Transvaal, Suid Afrika gebore. Buys is getroud met Melanie (Née Biscoff) en het 4 kinders. Hy het sy regteroog in 'n mesongeluk verloor toe hy 5 jaar oud was.

Loopbaan

Nadat hy by Hoërskool Sannieshof gematrikuleer het, het hy aan die Potchefstroomse Universiteit studeer, waar hy in 1988 kommunikasiekunde met staatsleer as hoofvak geneem het. In 1992 verwerf hy ’n honneursgraad in Arbeidsverhoudinge aan die Universiteit van Johannesburg. Tydens sy studiejare was hy lid van die studenteraad, voorsitter van die skaakklub, ondervoorsitter van die sendingdiensorganisasie, Hulpprojek, en redakteur van die meningstydskrif Perspektief. Flip het ook later kursusse in Politieke Ekonomie by Wits en Projekbestuur by die NWU gevolg.

As Uitvoerende Hoof van Solidariteit sedert 1997 het hy die ou Mynwerkersunie (MWU) uitgebou tot 'n groep van organisasies wat Afrikaans en die belange van die Afrikaner uitbou en verdedig. Hy het as arbeidsverhoudinge-offisier by Eskom begin werk in 1989 voordat hy as organiseerder na die MWU is. Hy het ook 'n ruk in die Volkstaatraad gedien wat voorstelle gemaak het vir die moontlike daarstel van 'n Volkstaat. Solidariteit, die huidige naam vir die voormalige MWU, se lidmaatskap het gestyg van ongeveer 30,000 tot 130,000 en bedien Afrikaners in verskeie bedrywe.

Buys is ook die krag agter AfriForum, 'n burgerregte-organisasie wat hom beywer om Afrikaans en Afrikaners se regte te beskerm. Buys het vakbond uiteindelik herontwerp as die Solidariteit Beweging. Die beweging bestaan uit 18 organisasies en dit verteenwoordig 350 000 gesinne. Die doel van die beweging is om ’n toekoms te help skep waarin die Afrikaanse gemeenskap vry, veilig en voorspoedig in Afrika kan voortbestaan.

Flip dien sedert 2015 as raadslid van die Noordwes-Universiteit. Hy is ook ’n trustee van die Dagbreek Trust en die Trust vir Afrikaanse Onderwys. Flip is ’n direkteur van die FAK en die Rapport Onderwysfonds, die Helpende Hand en Pretoria FM. Hy is ook ’n lid van die Suid-Afrikaanse Akademie vir Wetenskap en Kuns; lid van FNB Kommersieel se Adviesraad vir Gauteng-Noord; direkteur van die Solidariteit Beleggingsmaatskappy; direkteur (alt) van die Rand Mutual Versekeringsmaatskappy en direkteur (alt) van die Erfenisstigting.

Buys is 'n kampvegter vir Afrikaans en wil Afrikaans graag verryk op alle gebiede:

“Kleintyd was dit nie vir my 'n bewustelike besluit om lief te word vir Afrikaans nie. Dit was déél van my ‒ rondom my ‒ soos die grond en die gras en die geskiedenis. Soos water deel is van 'n vis se bestaan en gelyktydig 'n bestaansvoorwaarde is, so is Afrikaans vir my onafskeidbaar deel van wie en wat ek is. Dis die water waarin en waardeur ek leef, en die lewensasem wat ons moet deel – ook met nie-Afrikaanse mense. Ek glo almal moet kan deel in die vreugde van die Afrikaanse sonskyn,” sê Flip.

Bronnelys

• https://afrikaans.com/portefeulje/flip-buys/^{[dooie skakel]}