Floraryk

'n Floraryk is 'n fitogeografiese indeling van die (land)oppervlak van die aarde. Dit beteken dat dié indeling net op die verspreiding van plante oor die planeet gebaseer is, en nie op die (soögeografiese) verspreiding van die fauna nie.

Gewoonlik word ses floraryke onderskei:

Holarctis
Paleotropis
Neotropis
Capensis
Australis
Antarctis

Die indeling na plante verskil van die soögeografiese indeling. Byvoorbeeld die plante van die ryk Holarctis het groot ooreenkomste in 'n baie groot gebied, maar die diere in Noord-Amerika is verskillend van dié in Asië en Europa. In 'n soögeografiese indeling word gewoonlik Holarctis verdeel in 'n Palearktiese- en Nearktiese gebied. Die omgekeerde situasie word in Suid-Afrika aangetref. Die plantewêreld van die Kaap verskil baie van die res van Afrika. Fitogegrafies spreek mens van die floraryk Capensis, maar die diere is baie minder verskillend.^[1]

Daar is nóg verskille. Byvoorbeeld eilande soos Nieu-Guinea en die eilande van die Stille Oseaan word fitogeografies by Paleotropis gereken, maar die WWF-indeling, wat 'n sintese van fito- en soögeografiese indelings is, reken dit by die Australasiatiese en Oseaniese ekosones. Die suide van Suid-Amerika en die Suideiland van Nieu-Seeland word gewoonlik by die floraryk Antarctis gereken, maar nie by die Antarktiese ekosone nie.

Paleoryke

In die aarde se lang geskiedenis het floraryke verskil van die huidige en paleontoloë probeer om uit die fossiele gegewens en die kennis van die plaattektoniek die vroër omstandighede te herkonstrueer. Aan die begin van die Perm het byvoorbeeld 'n Gondwaniese, Euroamerikaanse, Angoraanse en Cathayse floraryk bestaan.

Verwysings

↑ The SAGE Handbook of Biogeography Andrew Millington, Mark Blumler, Udo Schickhoff, SAGE, 2011, ISBN 1-4462-5445-3, ISBN 978-1-4462-5445-5, bls. 77

[1] The SAGE Handbook of Biogeography Andrew Millington, Mark Blumler, Udo Schickhoff, SAGE, 2011, ISBN 1-4462-5445-3, ISBN 978-1-4462-5445-5, bls. 77

[1]