Fort Hill
Fort Hill was een van 'n reeks forte wat die Britse onwerheid tydens die Kaapse grensoorloë van 1779 tot 1877 op die oosgrens van die Kaapkolonie gebou het.
Hierdie fort by King William's Town is in 1835 as militêre hoofkwartier gebou na die proklamering van die Provinsie van Koningin Adelaide. Gedurende die Sesde Grensoorlog (die Oorlog van Hintsa, 1834-36) was dit die voorraaddepot vir die 10 forte in die nuwe provinsie. Op 28 Julie 1836 is die provinsie opgehef, Fort Hill ontruim en die kanonne na Fort Willshire geneem. Tydens die Oorlog van die Byl (die Sewende Grensoorlog, 1846-47) was King William's Town weer die sentrum van militêre bedrywighede en is Fort Hill weer beset, uitgebrei en versterk.
Fort Hill was aanvanklik 'n eenvoudige vierkantige konstruksie bestaande uit grondwalle met bastions vir 3 kanonne. Die kaserne gebou uit takke en klei kon 400 man huisves. By die herbouing is die mure met klip versterk. Daar was ruim magasyne, 'n klein hospitaal, 'n gevangenis en later selfs 'n tweede kruithuis. Dit alles was omring met grag.
Tydens die Sesde Grensoorlog het Harry Smith in die opgeknapte huis van sendeling John Brownlee naby die fort gewoon. Die fort is vernoem na lord Rowland Hill, die destydse hoof van die Britse Leër.
Slegs die twee kruithuise het behoue gebly, is tot monument verklaar en staan op die terrein van die huidige Lovedale Kollege in King William's Town.
Bibliografie
wysig- www.buffalocity.gov.za
- www.mbendi.com
Sien ook
wysig