Fred Barker
Frederick George Barker (12 Desember 1901 - 16 Januarie 1935), algemeen bekend as Fred Barker, was 'n Amerikaanse misdadiger wat die Barker-Karpis-bende in 1931 saam met Alvin Karpis gestig het. Hulle was in die 1930's verantwoordelik vir verskeie rooftogte, moorde en ontvoerings. Barker was die jongste seun van Ma Barker, wie se vier kinders almal misdadigers was. Hy is in 1935 saam met Ma in 'n lang skietery met die FBI doodgeskiet.
| Fred Barker | ||
| ||
| 'n Polisiefoto van Barker. | ||
| Gebore | 12 Desember 1901 | |
| Oorlede | 16 Januarie 1935 (op 33) | |
| Rede vir dood | Saam met Ma Barker doodgeskiet | |
| Land | VSA | |
| Ander name | Frederick George Barker (geboortenaam) | |
| Misdaadbesonderhede | ||
| Misdaad | Roof | |
| Beweging | Barker-Karpis-bende | |
| Vonnisbesonderhede | ||
| Status | Oorlede | |
Vroeë lewe wysig
Fred Barker is in 1901 as die seun van George Elias en Arizona Donnie Clark ("Ma" Barker) in Aurora, Missouri, gebore. Die gesin het in 1912 na Tulsa, Oklahoma, verhuis. Barker se ouer broers, Herman, Lloyd en Arthur, het dwarsdeur sy kinderjare misdade gepleeg; hulle het behoort tot die Central Park-bende, wat in Central Park byeengekom het om misdade te beplan en gesteelde goedere weg te steek. Daar het Barker toekomstige lede van die Barker-Karpis-bende ontmoet.
Barker is in 1927 die eerste keer vir roof in hegtenis geneem en tronk toe gestuur. Terwyl hy in die tronk was, het hy Alvin Karpis ontmoet. Volgens Karpis was Barker 'n dominante figuur in die tronk wat daarin geslaag het om dagga en ander verbode goed in die hande te kry. Karpis het ook gesê hy is 'n natuurlike moordenaar wat "nooit geweifel" het nie.[1] Anders as Karpis (wie se bynaam "Creepy Karpis" was), was Barker bekend vir sy sjarme. Hy is in 1930 vrygelaat.
Bende wysig
- Die hoofartikel vir hierdie afdeling is: Barker-Karpis-bende.
Nadat hulle vrygelaat is, het Barker en Karpis saamgespan om 'n reeks rooftogte in Kansas uit te voer. Hulle het dikwels saam met ander misdadigers gewerk. Die bende is vergesel van die Barker-broers se ma, Ma Barker, en haar minnaar, Arthur Dunlop, wanneer hulle gereis het.
In Desember 1931 het die bende sheriff C. Roy Kelly van die Howelldistrik in West Plains, Missouri, doodgeskiet en hulle moes uit die gebied vlug. Hulle is na Minnesota, waar nog verskeie moorde gepleeg is,[2] onder andere van Dunlop, 'n alkoholis met 'n "los mond" wat ook vir Ma sleg behandel het.
In 1933-'34 is twee ryk sakemanne, William Hamm en Edward Bremer, ontvoer en lospryse van altesaam $300 000 is vir hulle gekry. Die bende is kort daarna na Chicago, terwyl Fred en Ma Barker in 'n huis in Florida agtergebly het. Hulle het dit onder die van "Blackburn" gehuur en gesê het hulle is 'n ma en seun wat op die platteland vakansie wil hou.
FBI-agente het die twee se skuilplek in Florida ontdek nadat Arthur op 8 Januarie 1935 in Chicago in hegtenis geneem is. Agente het die huis op die oggend van 16 Januarie 1935 omsingel. Die FBI het nie geweet Karpis en die ander bendelede is drie dae tevore daar weg en dat net Ma en Fred in die huis was nie. Hulle is beveel om oor te gee, maar Fred het op hulle begin skiet. Hy en sy ma is gedood ná 'n skietery van vier uur. Baie plaaslike mense, selfs piekniekgangers, het na bewering na die skietery kom kyk.[3]
Albei lyke is in dieselfde slaapkamer aan die voorkant van die huis gevind. Fred s'n was vol skietwonde, maar Ma het blykbaar net een skietwond gehad.[3]
Verwysings wysig
Skakels wysig
Hierdie artikel is in sy geheel of gedeeltelik uit die Engelse Wikipedia vertaal.
