Fritz Krampe
Fritz Krampe (1913-1966) word in die kunsgeskiedenis van Suider-Afrika beskryf as Namibië se beroemdste skilder van die dierelewe van daardie land.
Krampe is in Desember 1913 in Berlyn gebore. Van kindsbeen af besoek hy gereeld die bekende Berlynse dieretuin en veral die olifante en gorillas maak indruk op hom. In Berlyn en München ontvang hy onderrig in die teken- en skilderkuns en hy lees baie oor die kuns en diere. Hy is ook in sy tyd in Duitsland lid van die Preussische Akademie der Künste. Op ’n besoek van drie maande aan Siberië bewonder hy die robbe, walvisse en rendiere. Uit hierdie ervaring spruit die opdrag om die boeke “Moby Dick” en “Peer Gynt” te illustreer. In die Tweede Wêreldoorlog is hy ’n krygsgevangene in Australië en in 1950 verhuis hy van Duitsland na Kaapstad. Daar verf hy aanvanklik huise, maar reeds in Julie 1951 hou hy daar ’n uitstallling van sy tekeninge, waterverfskilderye en litografieë.
Daarna vestig hy hom in Windhoek in die voormalige Suidwes-Afrika en daar is hy ’n baie gereelde besoeker aan die Etosha Nasionale Park. Krampe raak veral bekend vir sy baie groot muurskilderye in die ekspressionistiese styl van wilde diere. Hierdie skilderye is gewoonlik gans te groot vir ’n gewone huis en meestal is die uitbeelding te wreed. Geweld is ’n herhalende tema. Verder doen hy portretskilderye van inheemse mense en soms landskapppe. Ook doen hy in die tydperk nog boekillustrasies en skryf hy artikels oor die dierelewe vir plaaslike koerante.
Tydens sy leeftyd hou hy uitstallings in Suid-Afrika, Keulen, Venesië, Nederland en België. Sy laaste uitstalling was in Windhoek in Julie 1965.
Krampe word beskryf as ’n avonturier met ’n rustelose gees, skaam, nors, kortaf, onafhanklik, vreesloos, waaghalsig. Hierdie alleenloper se wanderlust bring hom in Oos-Afrika, Europa en Asië. In 1966 is hy op safari in die Midde-Ooste en op 28 Julie sterf hy in Indië in ’n onderonsie met ’n olifant.
Sy werke is te besigtig in o.a. die Rupert Museum op Stellenbosch, en in galerye in Johannesburg, Kimberley se William Humphreys-kunsgalery, Graaff-Reinet, Kaapstad, Pretoria en Windhoek.
Lees ook
wysigBibliografie
wysig- Levinson, Olga: Portrait of Fritz Krampe. Lantern. Tydskrif vir Kennis en Kultuur. Jaargang 16, no. 4, Junie 1967.
- Brosjure van die Republiekfees 1966 • Kunsuitstallings in amptelike opdrag gereël deur die Suid-Afrikaanse Kunsvereniging
- namibiana.de
- the-art-world.com