Gap Inc.
The Gap, Inc., algemeen bekend as Gap Inc. of Gap, is 'n Amerikaanse onderneming met wêreldwye belange in die mode-kleinhandelbedryf.
| The Gap Inc. | |
  | |
| Tipe | Publieke maatskappy |
|---|---|
| Gestig | 21 Augustus 1969 |
| Hoofkantoor | San Francisco, Kalifornië, Verenigde State |
| Sleutelpersone | Donald Fisher, Doris F. Fisher (stigters) Art Peck (hoof uitvoerende beampte) Bob Fisher (voorsitter) |
| Gebied bedien | Wêreldwyd |
| Industrie | Kleinhandelbedryf |
| Produkte | Klerasie |
| Inkomste |  VSA-$ 16,148 miljard (2014) |
| Bedryfsinkomste | VSA-$ 2,149 miljard (2014) |
| Netto inkomste | VSA-$ 1,28 miljard (2014) |
| Werknemers | 137 000 (Mei 2014) |
| Divisies | Banana Republic · Old Navy · Athleta · Intermix |
| Webwerf | gapinc.com |
Die onderneming, wat hom op informele mode toespits, is in 1969 deur Donald Fisher en Doris F. Fisher gestig en het sy hoofkwartier in San Francisco, Kalifornië. Gap Inc. is in vyf primêre sake-afdelings verdeel: Gap, Banana Republic (met meer klassieke modereekse), Old Navy (laeprys-modereekse), Intermix (gesofistikeerde damemodewinkels) en Athleta (sportklerasie vir dames). Volgens die getal winkels is Gap Inc. die derde grootste rolspeler in die internasionale mode-kleinhandelbedryf, na die Spaanse Inditex-groep en die Sweedse H&M-winkelketting.
Naas sy Amerikaanse tuismark en sy aanlynwinkels bedryf Gap Inc. meer as 3 700 winkels wêreldwyd, regstreeks of as konsessiesake – so onder meer in Kanada, Suid-Amerika, Europa, Afrika, Asië en Australië. Bedrywighede in Duitsland, 'n sleutelmark waartoe Gap Inc. in 1988 toegetree het, is in 2004 vanweë onbevredigende resultate gestaak en eers in 2004 deur 'n samewerkingsooreenkoms met die Duitse aanlynhandelaar Zalando hervat.
Nadat die Suid-Afrikaanse modeketting Stuttafords reeds sedert 2007 Gap-produkte in sy winkels verkoop het, het Gap Inc. vanaf 2010 marknavorsing oor 'n moontlike toetreding tot die Suid-Afrikaanse mark gedoen en uiteindelik 'n konsessieooreenkoms met Stuttafords aangegaan waarvolgens die eerste Gap-winkel in 2012 in die Johannesburgse voorstad Sandton geopen is.[1]