George Behrman (Worcester, Kaapland, 2 Junie 1913 – onbekend) was ’n Suid-Afrikaanse sakeman, besturende direkteur van Crown Mills Spice Works Bpk. en direkteur van verskeie maatskappye.

Behrman was die seun van L. Behrman. Nadat hy sy skoolopleiding aan die hoërskool op sy geboortedorp voltooi het, het hy sewe jaar lank gewerk by sy vader, die stigter van Worcester Gedroogde Vrugte Industrie, sodat hy die nodige ervaring en opleiding kon kry. Dié diens het hy verlaat om in Johannesburg by ’n afdeling van Crown Mills as boekhouer en reisiger aan te sluit. In 1937 het hy in vennootskap van die beherende maatskappy weggebreek. In 1948 het hy alleeneienaar van die onderneming geword, waarna dit floreer het tot ’n selfstandige maatskappy.

Behrman is op 24 Desember 1941 met Ada, dogter van W. Sacks, getroud. Een seun en een dogter is uit hul huwelik gebore. Sy liefhebberye was voetbal, tuinmaak en tennis. In die vroeë sestigerjare het die gesin by Jan Smutslaan 65, Westcliff, Johannesburg, gewoon.

Bronne wysig

  • (af) (en) Kruger, dr. D.F. 1963. Wie is wie in Suid-Afrika. Johannesburg: Vitae Uitgewers.