Gereformeerde kerk Brackenhurst

Die Gereformeerde kerk Brackenhurst was ’n gemeente van die Gereformeerde Kerke van Suid-Afrika in die suide van die Randse dorp Alberton. Dit het op 24 Augustus 1996 ophou bestaan ná samesmelting met Eikenhof (1946) om Brackenhof te vorm.

Agtergrond

Die behoefte aan ’n derde Gereformeerde kerk op Alberton is aan die begin van die 1980's gevoel. In Mei 1982 het Brackenhurst van Alberton-Wes (1966) afgestig nadat die moedergemeente Alberton reeds in 1939 as die sewende gemeente aan die Oos-Rand gestig is. Die nuwe gemeente Brackenhurst het eers kerk gehou in die saal van die Laerskool Willem Cruywagen (later herdoop tot die Laerskool Orion), terwyl die kerkraad onderhandel het oor ’n geskikte terrein vir die oprigting van ’n kerkgebou.

Kerkbou

Bouwerk aan die siersteenkerk het in die tweede helfte van 1983 begin. Die argitek was Albert Monteith en die bouaannemer Capital Civil Building Constructors. Die totale boukoste het sowat R450 000 beloop. Die hoeksteen is op 18 Maart 1984 gelê en van 16 tot 18 November 1984 is die kerkgebou feestelik in gebruik geneem. Dié siersteengebou is veeldoelig ontwerp, want die kerkruimte en -kantoor, saalkompleks en kombuisgeriewe is alles onder een dak. Net ’n gordyn skei die kerkgedeelte en saal wat oopgetrek kan word wanneer meer plek benodig word. Die kerkruimte bied sitplek aan 450 mense. Aan die suidekant van die kerkgebou is klaskamers vir kategese-onderrig, ’n integrale deel van die kerkkompleks.

Nadat Brackenhurst en Eikenhof saamgesmelt het, is Eikenhof se klein pyporrel oorgeplaas na die Brackenhurst-kerk, waarin die saamgestelde gemeente sedertdien aanbid. ’n Jaar of wat ná die samestelling het Brackenhof 396 belydende ’n 154 dooplidmate gehad, maar einde 2014 het dit afgeneem tot onderskeidelik 186 en 39. In die Gereformeerde Kerk se eeufeesjaar (1959) het Eikenhof, destydse die negende oudste Gereformeerde kerk aan die Oos-Rand, se belydende lidmate 93 getel en die dooplidmate 34.

Predikant

Brackenhurst het in sy hele 14 jaar lange bestaan net een predikant gehad.

• Krüger, dr. Petrus Paulus, 1982-1996 (waarna Brackenhof, 1996-2000)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.