Ds. Johannes Georg (Hannes) Noëth (gebore 11 Augustus 1974) is 'n Suid-Afrikanse skrywer en direkteur van die vakbond Solidariteit se Helpende Hand-beweging. Hy was tot einde Oktober 2017 predikant in die Gereformeerde Kerke in Suid-Afrika en hoof van die Gereformeerde Skool Dirk Postma in Pretoria.

J.G. Noëth
Ds. Hannes Noëth
Ds. J.G. Noëth

Naam Johannes Georg Noëth
Geboorte 11 Augustus 1974
Petrusburg, Oranje-Vrystaat
Kerkverband Gereformeerd
Gemeente(s) Wolmaransstad 2000–2006
Naboomspruit 2006–2009
Kimberley 2010–2013
Totiusdal 2014–2017
Jare aktief 2000–2017
Kweekskool Potchefstroom
Ds. Hannes Noëth, skoolhoof, en leerders van die Gereformeerde Skool Dirk Postma op die laaste skooldag van 2015.

Herkoms en opleiding wysig

Noëth het grootgeword op die plaas Twyfelhoek tussen Petrusburg en Koffiefontein in die Suidwes-Vrystaat. Hy matrikuleer in 1992 aan die Hoërskool A.J.C. Jooste op Petrusburg en verwerf in 1995 'n B.A.-graad met Grieks en filosofie as hoofvakke aan die destydse Potchefstroomse Universiteit vir Christelike Hoër Onderwys. In 1998 volg 'n B.A. Hons. in teologie en in 1999 'n Th.B. Hierna voltooi hy sy teologiese opleiding aan die Gereformeerde Kerke se Teologiese Skool op Potchefstroom met 'n meestersgraad (Th.M.) in huweliksetiek.

Gemeentebediening wysig

Sy eerste gemeente, van 2000 tot 2006, was Wolmaransstad, waarna hy 'n beroep na Naboomspruit aanvaar en daar dien tot 2009. Van Januarie 2010 tot 2013 was hy leraar van die Gereformeerde kerk Kimberley, maar aanvaar in 2014 'n beroep as medeleraar na Totiusdal en word terselfdertyd hoof van die Gereformeerde Skool Dirk Postma, wat geleë is binne Totiusdal se gemeentegrense.

Breër betrokkenheid wysig

Noëth het sedert 1994 in die deputate vir historiese sake van die Gereformeerde Kerke in Suid-Afrika gedien. Omstreeks 2010 het hy begin werk aan sy Th.D. aan die Universiteit van die Vrystaat oor die prediking tydens die Anglo-Boereoorlog. Terselfdertyd was hy teksredigeerder, samesteller en verwerker betrokke by die opstel van Van seringboom tot kerkgebou, die argitektoniese erfenis van die Gereformeerde Kerke, wat in 2010 die lig gesien het. Hy is, saam met M.C. van Rooyen, medesamesteller van My Dopperdagboek, waarvan die eerste uitgawe op 9 Desember 2016 verskyn het en die tweede op 27 November 2017. Noëth dien in die direksies van die Erfenisstigting, die Voortrekkermonument, die Federasie van Afrikaanse Kultuurvereniginge, Maroela Media en Solidariteit Helpende Hand. Hy dien op die bestuur van die Vriende van die Oorlogsmuseum en Die Krugergenootskap.

Bron wysig

  • (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.