Goudini Spa
Goudini Spa is 'n warmwaterbron naby Worcester in die Wes-Kaap. Dit is 'n gewilde naweekbestemming vir inwoners van Kaapstad.
Die bron is geleë by 33°40′7.67″S 19°15′50″O / 33.6687972°S 19.26389°O en 6 km noordwes van Rawsonville aan die pad deur die Slanghoekvallei. Dit lewer 270 000 liter per dag teen ongeveer 40,1°C by die oog.
Die bron was al aan die begin van die 18de eeu aan die blanke setlaars bekend. Dit was egter maar min deur reisigers besoek, omdat dit ver van die destydse hoofroetes geleë was. Destyds het die verkeer na die binneland oor die Hottentots-Hollandberge of via die Roodezand gegaan. Die bou van die Bainskloofpas, Du Toitskloofpas en die spoorlyn van Wellington na Ashton het hierdie landsdeel ontsluit, bygedra dat die warmbron ontwikkel is en in 1841 tot openbare oord verklaar is. In die 1920’s is 'n hotel hier gebou, later het Rondalia dit in 'n vakansieoord omskep en tans word dit deur die ATKV bedryf.
Goudini is 'n Khoikhoi-woord met die waarskynlike betekenis van “wilde heuning”.
Bibliografie
wysig- Booyens, Bun: Bronwaters van genesing. Die tradisionele warmbron-waterkuur in ons volksgeneeskunde. Kaapstad: Tafelberg, vir die Raad vir Geesteswetenskaplike Navorsing, 1981. ISBN 0-624-01584-X