Grey's Pass

Die Grey’s Pass (Greyspas) oor die Olifantsrivierberge het in onbruik verval met die opening van die Piekenierskloofpas.

Die aanvanklike roete oor hierdie berge was ‘n voetpad van die Khoisan. Ongeveer hierdie koers is ook gevolg deur die geselskappe van Jan Danckaert in 1660, Pieter Cruythoff in 1661, Simon van der Stel in 1685, Carl Peter Thunberg in 1773 en Hinrich Lichtenstein in 1803.

Thomas Bain het hier ‘n roete oor die Piekenierskloof uitgemeet op ‘n afstand van ongeveer 2km vanaf die oorspronklike voetpad. Op 17 Februarie 1857 het hy met ‘n span bandiete aan die pas begin bou en na slegs anderhalwe jaar was die nuwe pas voltooi. Met die amptelike opening op 17 November 1858 is dit na die goewerneur, sir George Grey, vernoem. Die geleidelike helling van die nuwe pas het dit uitstekend geskik gemaak vir die gebruik daarvan deur ‘n kar en perde.

Die latere Piekenierskloofpas tussen Eendekuil en Citrusdal volg ‘n ander roete, alhoewel dit die Grey’s Pass by die kruin kruis. Dele van die ou pas word egter nog deur boere gebruik.

Let Wel

'n Kort straatjie tussen Koningin Victoriastraat en Oranjestraat in die middestad van Kaapstad staan ook bekend as Grey’s Pass.

Lees ook

• Lys van bergpasse in Suid-Afrika

Bron

• Burman, Jose: So High the Road – mountain passes of the Western Cape. Kaapstad: Human & Rousseau, 1963