Groothertog Nikolaas Konstantinowitsj van Rusland

Hierdie naam is volgens die Oos-Slawiese gebruik; die patroniem is Konstantinowitsj en die van is Romanof.

Nikolaas Konstantinowitsj
Groothertog
Huis	Romanof
Vader	Groothertog Konstantyn Nikolajewitsj
Moeder	Prinses Alexandra van Sakse-Altenburg
Gebore	14 Februarie [O.S. 2 Februarie] 1850, Sint Petersburg, Russiese Ryk
Oorlede	26 Januarie [O.S. 14 Januarie] 1918, Tasjkent, nou in Oesbekistan
Eggenote	Nadezjda Aleksandrowna van Dreyer
Kinders	Prins Artemi Nikolajewitsj Romanofski-Iskander Prins Aleksander Nikolajewitsj Romanofski-Iskander

Groothertog Nikolaas Konstantinowitsj (Russies: Николай Константинович; 14 Februarie [O.S. 2 Februarie] 1850 – 26 Januarie [O.S. 14 Januarie] 1918) was die eersgebore seun van groothertog Konstantyn Nikolajewitsj van Rusland en ’n kleinseun van keiser Nikolaas I.

Lewe

Die paleis van groothertog Nikolaas Konstantinowitsj in Tasjkent soos dit tans lyk.

Hy is in Sint Petersburg gebore en toe hy groter was, was hy ’n bekwame militêre offisier en ongeneeslike rokjagter. Hy het ’n affair gehad met ’n berugte Amerikaanse vrou, Fanny Lear. Dit het daartoe gelei dat hy drie waardevolle diamante gesteel het van ’n ikoon wat aan sy ma behoort het. Hy is geestelik versteur verklaar en is na die buitewyke van die Russiese Ryk verban.

Hy het baie jare onder toesig in die gebied om Tasjkent in die suidoostelike deel van die keiserryk (nou in Oesbekistan) gewoon en het ’n groot bydrae tot die stad gemaak deur die plaaslike gebied met sy eie geld te help verbeter. In 1890 het hy vir hom ’n paleis in Tasjkent laat bou om sy groot, waardevolle versameling kunswerke uit te stal; die versameling is nou die middelpunt van die Kunsmuseum van Oesbekistan. Hy was hier ook bekend as ’n bekwame ingenieur wat twee groot besproeiingskanale laat bou het.

Nikolaas het verskeie kinders by verskillende vroue gehad.

Dood

Nikolaas is op 26 Januarie 1918 aan longontsteking dood en is in Tasjkent begrawe.

Familie

Hy is in 1882 met Nadezjda Aleksandrowna van Dreyer getroud; sy was die dogter van die Orenburgse polisiehoof, Aleksander Goestawowitsj Dreyer. Twee kinders is uit die huwelik gebore:

• Artemi Nikolajewitsj, prins Iskander (of prins Romanofski-Iskander) (1883–1919)
• Aleksander Nikolajewitsj, prins Iskander (of prins Romanofski-Iskander) (1887-1957)

Onder sy buite-egtelike kinders tel:

• Olga Nikolajewna Wolinskaja (1877–1910)
• Nikolaas Nikolajewitsj Wolinski (1878-1913)
• Stanislaf (oorl. 1919)
• Nikolaas (oorl. 1922)
• Daria (oorl. 1936)
• Tatjana (oorl. ?)

Sien ook

• Lys van groothertoë van Rusland
• Huis van Romanof

Skakels

• Hierdie artikel is vertaal uit die Engelse Wikipedia