Hans von Koessler

Hans von Koessler (1 Januarie 1853 - 23 Mei 1926) was 'n Duitse komponis, dirigent en musiekonderwyser. In die Koninkryk van Hongarye, waar hy vir 26 jaar werksaam was, het hy bekendgestaan as János Koessler.

Koessler was 'n neef van Max Reger, en is gebore in Waldeck, Fichtelgebirge (Fichtelgebergtes) (nou deel van Kemnath, Opper-Palts).

Hy het van 1874 tot 1877 die orrel onder Josef Rheinberger studeer en koorlesse van Franz Wüllner in München ontvang. Onmiddellik hierna het hy na Dresden verhuis waar hy aangestel is as direkteur en onderwyser vir musiekteorie en koorliedere aan die Hochschule für Musik Carl Maria von Weber Dresden. Vanaf 1878 was hy ook dirigent van die Dresdner Liedertafel orkes. Van 1882 tot 1908 het hy aanvanklik onderrig gegee in orrel en koormusiek aan die Franz Liszt Musiekakademie (Nasionale Akademie van Musiek in Boedapest) in Hongarye. Later het hy ook professor in komposisie geword en is hy tot die adelstand verhef.

Sy studente (soos byvoorbeeld Zoltán Kodály, Béla Bartók en Ernő Dohnányi) het van die beste Hongaarse komponiste van daardie era geword. Na sy aftrede in 1908 het hy teruggekeer na Duitsland.

Koessler het meer as 130 werke gekomponeer, waaronder 'n opera, twee simfonieë, simfoniese variasies vir orkes, 'n vioolconcerto, twee strykkwartette, 'n strykkwintet, 'n stryksekstet, 'n klavierkwintet, 'n suite vir klavier, viool en altviool, en 'n mis vir vrouekoor en orrel. Hy het ook psalms getoonset. As gevolg van sy wisselvallige leefwyse het 'n groot aantal van sy komposisies egter verlore gegaan of in private hande geland.

Koessler se kamermusiek is hoog aangeprys deur verskeie kommentators, waaronder die vooraanstaande kamermusiek wetenskaplike Wilhelm Altmann, wat Koessler se Tweede Strykkwartet en sy Trio-suite vir klavier, viool en altviool vir spesiale lof uitgesonder het.

Hy is in 1926 in Ansbach op 73-jarige ouderdom oorlede.

Bronne

• The New Grove Dictionary of Music & Musicians, Macmillan 1980
• Cobbett's Cyclopedic Survey of Chamber Music, Oxford University Press 1963
• Handbuch für Streichquartettspieler, Wilhelm Altmann, Heinrichshofen Verlag 1972

Eksterne skakels

• Hans Koessler klankgrepe van & inligting oor sy Trio Suite vir Viool, Altviool en Klavier, Strykkwintet & Stryksekstet
• Musiek en media deur Hans von Koessler op die International Music Score Library Project

Hierdie artikel is in sy geheel of gedeeltelik vanuit die Engelse Wikipedia vertaal.