Hertogdom Friedland
Die Hertogdom Friedland (Tsjeggies: Frýdlantské vévodství) was 'n kortstondige domein wat gedurende die Dertigjarige Oorlog in die noordooste van Boheme bestaan het. Die hertogdom is deur die keiserlike generalissimus Albrecht von Wallenstein geskep wat vanaf 1625 die titel "Hertog van Friedland" gedra het. Die hertogdom se historiese kerngebied het uit twee domeine bestaan, Friedland en Reichenberg, wat in 1621 deur Ferdinand II, keiser van die Heilige Romeinse Ryk, aanvanklik as pand aan Wallenstein gegee is en een jaar later in 'n ewige erfleen omgeskep is.
Wallenstein het Friedland vanaf 1621 binne enkele jare tot 'n klein modelstaat uitgebou wat hy streng geadministreer het. Die ekonomiese doeltreffendheid van plaaslike boerderye, myne en sakeondernemings is deur Wallenstein merkbaar verhoog, terwyl die inkomste daaruit aangewend is om in die behoeftes van sy leër te voorsien.
Benaming en ligging
wysig
Naamgewend vir die nuutgeskepte hertogdom was Friedland, 'n nedersetting in die noorde van Boheme, terwyl Jitschin in die Boheemse Paradys as residensiestad gedien het. Die hertogdom was noordoos van Praag geleë en het oor die grootste deel van die gebied gestrek wat deur die Elbe se rivierkronkel in Boheme omsluit word, met 'n totale oppervlakte van sowat 9 000 vierkante kilometer. In die noorde het Friedland aan Silesië en Opper-Lausitz gegrens. Die Ysergebergte het, net soos dele van die Reusegebergte met die Elbe se brongebied, deel uitgemaak van die hertogdom.