Hoggenheimer

Hoggenheimer is ‘n denkbeeldige karakter in die spotprente van Daniël Cornelis Boonzaier.

Die figuur word uitgebeeld as ‘n ryk, vet, onverfynde multimiljoenêr wat ooglopend trots is op die geld wat hy al bymekaargemaak het. Hy was ‘n satiriese voorstelling van die Randse kapitaliste en mynbase. Barney Barnato is blykbaar deur Boonzaier as model gebruik en die naamkeuse verwys vermoedelik na Ernest Oppenheimer. Hierdie spotprentfiguur was sekerlik Boonzaier se bekendste skepping en het ‘n groot rol gespeel in die politiek van daardie tyd.

Hierdie komiese figuur in die politieke karikatuurtekeninge van vroeg in die 20ste eeu versinnebeeld die buitelandse geldmagte se uitbuiting van die armblankes en die hebsugtige en inhalige imperialisme. Die spotprente toon die algemene afkeur onder die Afrikaners van ‘n denkwyse wat materialisme ophemel.

Lees ook

• Randhere

Bibliografie

• Giliomee, Hermann: Die Afrikaners - 'n Biografie. Kaapstad: Tafelberg Uitgewers, 2004. ISBN 0-624-04181-6
• Pretorius, Fransjohan (red.): Geskiedenis van Suid-Afrika. Van voortye tot vandag. Kaapstad: Tafelberg, 2012. ISBN 978-0-624-05466-5