Hudson's Bay Company
Die Hudson's Bay Company (Frans: Compagnie de la Baie d'Hudson), kort HBC, of "The Bay" ("La Baie" in Frans) is die oudste handelsonderneming in Noord-Amerika en ook een van die oudstes ter wêreld. Die maatskappy het hom vir die grootste deel van sy geskiedenis op die pelshandel toegespits, maar is intussen met winkelkettings soos Hudson's Bay (vroeër The Bay), Zellers, Home Outfitters en Lord & Taylor dwarsoor Kanada en die Verenigde State by die Noord-Amerikaanse kleinhandelbedryf betrokke. Die onderneming se huidige hoofkwartier is in die Simpson-toring, 'n wolkekrabber in Toronto, Ontario gesetel.
| The Hudson's Bay Company Compagnie de la Baie d'Hudson | |
   | |
| Tipe | Publieke maatskappy |
|---|---|
| Gestig | 2 Mei 1670 |
| Hoofkantoor | Toronto, Ontario, Kanada |
| Sleutelpersone | Richard Baker (goewerneur en uitvoerende voorsitter) |
| Industrie | Handelsbedryf |
| Bedryfsinkomste | 5,223 miljard CDN-$ in 2013 |
| Moedermaatskappy | NRDC Equity Partners |
| Divisies | Hudson's Bay Lord & Taylor Zellers Home Outfitters Saks Fifth Avenue Saks Fifth Avenue OFF 5TH Galeria Kaufhof Galeria Inno |
| Slagspreuk | Sense and simplicity |
| Webwerf | hbc.com |
Die maatskappy is in 1670 in Engeland met 'n koninklike oktrooi as The Governor and Company of Adventurers of England trading into Hudson's Bay geïnkorporeer en het in dele van Noord-Amerika as 'n soort de facto-regering gefungeer voordat Europese state en later die Verenigde State aanspraak op hierdie gebiede gemaak het. Op een tydstip was dit die grootste landbesitter ter wêreld, waarby Rupert's Land sowat vyftien persent van die Noord-Amerikaanse oppervlakte beslaan het.
Eeue lank het die maatskappy vanuit sy hoofkwartier in York Factory, Manitoba in Hudsonbaai die pelshandel in die grootste deel van die Brits-oorheerste Noord-Amerika beheer. Tydens hulle verkenningstogte het sy pelshandelaars en -jagters in aanraking met baie groepe van die Eerste Nasies in aanraking gekom en vroeë verhoudings met hulle gesmee. Sy netwerk van handelsposte sou die basis vir die latere amptelike beheer in baie gebiede van Wes-Kanada en die Verenigde State gevorm. In die 19de eeu het sy uitgestrekte besittings die grootste komponent van die nuutgevormde Dominium van Kanada geword waarin die maatskappy die grootste privaat landeienaar was.
Met die agteruitgang van die pelshandel het die maatskappy sy belange herstruktureer om voortaan as handelsonderneming lewensnoodsaaklikhede aan setlaars in die Kanadese weste te verskaf. Die Hudson's Bay Company se argiewe, 'n versameling van baie van sy rekords en kaarte, is in Winnipeg, Manitoba geleë.
Nadat die maatskappy verskeie kere van eienaar gewissel het, is dit in Julie 2008 deur 'n Amerikaans-gebaseerde privaat beleggingsmaatskappy, NRDC Equity Partners, oorgeneem. Hierdie onderneming was ook die eienaar van die afdelingswinkelketting Lord & Taylor. Tussen 2008 en 2012 is HBC deur een van NRDC se eiendomsmaatskappye, Hudson's Bay Trading Company, bestuur wat op 23 Januarie 2012 ontbind is. HBC word tans regstreeks deur NRDC bestuur en hou naas sy Kanadese dogtermaatskappye Hudson's Bay, Zellers en Home Outfitters ook toesig oor Lord & Taylor se bedrywighede in die VSA.
In 2015 het HBC een van die grootste afdelingswinkelkettings in Duitsland, Galeria Kaufhof, oorgeneem.[1]