Ilja Moeromets

Ilja Moeromets (Russies: Илья́ Му́ромец; letterlik Elia van Moerom) is ’n Slawiese folklore-held van Kiëf-Roes. Sy lof word besing in verskeie bilini (epiese gedigte). Hy, Dobrinja Nikititsj en Aljosja Popowitsj word beskou as die grootste van die legendariese bogatiri, of ridders, van Kiëf-Roes. Hulle word saam uitgebeeld in Wiktor Wasnetsof se bekende skildery Богатыри (regs).

Bogatiri, deur Wiktor Wasnetsof (1898). Van links is Dobrinja Nikititsj, Ilja Moeromets en Aljosja Popowitsj.

Ilja in heldeverhale

Ilja Moeromets deur Wiktor Wasnetsof (1914).

Vogens legendes is Ilja, die seun van ’n boer, op die dorpie Karatsjarowo naby Moerom gebore. As kind was hy baie siek en hy kon eers op 33 loop nadat hy wonderbaarlik deur twee pelgrims gesond gemaak is. Hy het toe bomenslike krag gekry by ’n sterwende ridder, Swjatogor. Daarna het hy vertrek om die stad Kiëf te bevry. Op pad daarheen het hy ook die stad Tsjernigof man-alleen teen invallers verdedig en in die woude van Briansk ’n monster doodgemaak wat reisigers vermoor het.

Legendariese figuur

Ilja Moeromets se naam is sinoniem met besonderse fisieke en spirituele krag en integriteit. Hy was al die held in verskeie rolprente, tekenprente en verhale en is die enigste epiese held wat deur die Russies-Ortodokse Kerk as heilige verklaar is.

Hoewel sy oorskot na bewering bewaar word in die Kiëfse Klooster van die Grotte, was hy waarskynlik nie ’n enkele persoon nie, maar eerder ’n verteenwoordiging van verskeie ware en fiktiewe helde uit verskillende tydperke.

Verwysings

• Encyclopedia Mythica Geargiveer 13 Junie 2008 op Wayback Machine
• Russiese feëverhale
• Die evolusie van die Christendom

Eksterne skakel

• Foto's van Moeromets Geargiveer 15 September 2008 op Wayback Machine (Russies)
• Hierdie artikel is vertaal uit die Engelse Wikipedia