Internasionale Lughawe Sjeremetjewo

Alexander S. Poesjkin Sjeremetjewo Internasionale Lughawe
Alexander S. Poesjkin Sjeremetjewo Internasionale Lughawe; Sheremetyevo International Airport; Международный аэропорт Шереметьево
	Lugfoto van Sjeremetjewo
IATA: SVO – ICAO: UUEE
Opsomming
Tipe lughawe	Openbaar
Operateur	International Airport Sheremetyevo
Bedien	Moskou
Ligging	Khimki, Moskou-oblast, Rusland
Spil vir	Aeroflot; Nordavia; Nordwind Airlines;
Hoogte bo seevlak	622 vt / 190 m
Koördinate	55°58′22″N 37°24′53″O / 55.97278°N 37.41472°O
Webtuiste	www.svo.aero
Landkaart
	UUEE Ligging binne die Moskou-oblast
Aanloopbane
Statistieke (2019)
Passasiers	49 933 000
Lugbewegings	386 370
Lugvrag (ton)	379 000
	Bron: Sjeremetjewo-lughawe

Die Sjeremetjewo Alexander S. Pushkin Internasionale Lughawe (Russies: Международный аэропорт Шереметьево) is ’n internasionale lughawe in die Moskou-oblast, Rusland. Dit is sowat 29 km noordwes van Sentraal-Moskou geleë. Dit is die hooflughawe van die Russiese internasionale lugdiens Aeroflot, en saam met Domodedowo en Wnoekowo een van die hooflughawens van Moskou. (Die IATA-kode vir aldrie die lughawens is MOW). Dit is naas Domodedowo die grootste lughawe in Rusland. In 2017 het die lughawe veertig miljoen passasiers bedien.

Geskiedenis

Sjeremetjewo is op 11 Augustus 1959 in gebruik geneem, met die eerste internasionale vlug op 1 Junie 1960 na Berlyn se Schönefeld-lughawe. Sjeremetjewo-1, wat vir binnelandse vlugte gebruik word, het op 3 September 1964 geopen.

Sjeremetjewo-2, die grootste van die twee terminaalkomplekse, is op 1 Januarie 1980 in gebruik geneem vir die Olimpiese Somerspele in 1980. Dit word gebruik vir internasionale vlugte. Daar is geen fisieke verbinding tussen die twee terminaalkomplekse nie; dit is basies twee verskillende lughawens wat dieselfde aanloopbane gebruik. Min ander lughawens het ’n soortgelyke uitleg.

Uitbreiding

Die binnekant van die nuwe Terminaal C.

In die 2000's het die mededinging van ander, geriefliker lughawens soos Domodedowo toegeneem. Die behoefte aan uitbreiding het al hoe dringender geword met groot internasionale lugdienste soos Lufthansa, British Airways, Iberia Airlines, Japan Airlines, Brussels Airlines, Austrian Airlines Group en Swiss International Air Lines wat die lughawe gebruik.

’n Nuwe terminaal, Terminaal C, is langs Terminaal 1 (of Sjeremetjewo-1) gebou. Dit het ’n vloeroppervlak van 40 000 m² en kan 5 miljoen passasiers per jaar hanteer. Terminaal 1 word hoofsaaklik gebruik vir binnelandse laekostevlugte en vlugte na Minsk, Belarus. Daar word beplan om dit op te knap as ’n terminaal vir besigheidstralers en dit te hernoem na Terminaal B.^[1]

Terminaal D is in November 2009 langs Terminaal 2 (nou bekend as Terminaal F) in gebruik geneem. Die gebou van 170 000 m² word gebruik deur Aeroflot en sy SkyTeam-vennote en kan 12 miljoen passasiers per jaar hanteer.^[2] Aeroflot het sedert 2010 al sy internasionale vlugte van Terminaal F na Terminaal D geskuif.

Intussen word Terminaal F opgeknap. ’n Deel, Terminaal E^[3] is reeds in gebruik en verbind Terminaal D en F. Sedert 3 Julie 2010 verbind ’n loopweg Terminaal D, E, F en die Aeroexpress-spoorwegterminaal,^[4] en sedert 2 November 2010 is daar ’n loopweg tussen Terminaal D, E en F.

Vervoer

’n Trein na Sentraal-Moskou.

Trein

In November 2004 is daar ’n sneltrein wat loop tussen die Sawjolofski-spoorwegterminaal en Lobnja-stasie, wat sowat 7 km van die lughawe af is. Van daar kan ’n bus of taxi gehaal word. Op 10 Junie 2008 is ’n spoorwegterminaal voor Terminaal F geopen met ’n direkte diens van Sawjolofski af. ’n Busdiens vervoer passasiers van Terminaal B en C.^[5] Op 28 Augustus 2009 is die lyn verleng na die Beloroessk-spoorwegterminaal en teen 2015 sal ’n nuwe sentrale spoorlyn al drie die hooglughawens van Moskou bedien.^[6]

Pad

Die hoofpad na die lughawe, die Leningradskoje-snelweg, ondervind groot verkeersknope. Stadige busse en vinniger minibustaxi's (bekend as marsjroetkas) vebind Sjeremetjewo met Moskou se uitgebreide metro-netwerk. Daar is ook amptelike lughawe-taxi's beskikbaar op die lughawe.