Jayavarman IV
Jayavarman IV (Khmer: ជ័យវរ្ម័នទី៤) was van 928 tot 941 koning van die Khmer-ryk. Baie vroeë historici het gedink hy was ’n troonrower, maar bewyse is onlangs gevind dat hy ’n wettige aanspraak op die troon gehad het.
| Jayavarman IV | |
|---|---|
| Koning van die Khmer-ryk | |
| Bewind | 928-941 |
| Voorganger | Ishanavarman II |
| Opvolger | Harshavarman II |
| Dinastie | Khmer-ryk |
| Moeder | Mahendradevi |
| Eggenote | Halfsuster van Yasovarman I |
| Kinders | Harshavarman II |
| Oorlede | 941 |
| Postume naam | Paramashivapada |
Lewe
wysigHy was die seun van koning Indravarman I se dogter Mahendradevi en was getroud met sy tante, ’n halfsuster van Yasovarman I. Omdat daar geen vasgestelde opvolgingsreëls was nie, lyk dit of sy aanspraak deur sy ma se lyn geldig was.[1] Hy het die bewind van Yasovarman I se seuns by Angkor sedert die dood van hul pa teengestaan. In 921 het hy sy eie hoofstad by Koh Ker gestig. ’n Inskripsie uit 921 lui: "Jayavarman IV het die stad Yashodharapura verlaat en by Chok Gargyar gaan regeer, en hy het die Devaraja saam met hom geneem." [2] Die stryd om die troon het geduur van 921 tot met die dood van Ishanavarman II in 928, waarna Jayavarman IV alleen regeer het.
Koh Ker, wat bekend is om sy ou ruïnes, kan deesdae makliker as in die verlede bereik word danksy ’n tolpad.[3] Dit was duisend jaar lank verlate totdat Franse geleerdes dit aan die einde van die 19de eeu besoek en bestudeer het. Tydens sy bewind was die hoofstad bekend as "Chok Gargyar" (die "Eiland van Glorie") of "Lingapura".[4]:360,363 Dit was ’n ommuurde stad van sowat 1,2 km2, maar bykomende tempels was oor ’n gebied van 35 km2 versprei.[5] Die hoofgebied bevat die Rahal-baray (1 188 x 548 m) en die Prasat Thom-kompleks met sy piramide van sewe vlakke van altesaam 30 m hoog. Baie van die beste en grootste standbeelde van Angkor is tydens sy bewind gemaak, soos die Garuda wat by die ingang van die Nasionale Museum van Kambodja staan.
Jeyavarman IV is in 941 dood en het die postume naam Paramashivapada gekry. Sy opvolging was nie vreedsaam nie en sy jong seun, Harshavarman II, het vir ’n kort rukkie tot in 944 regeer. Daarna het Rajendravarman II, die oom en neef van Harshavarman, die hoofstad na Yasodharapura teruggeskuif.[6]
Verwysings
wysig- ↑ Higham, 2001: p.70
- ↑ Coedès, 1968: p.114
- ↑ Ray, Nick (2008). Cambodia (6th uitg.). Lonely Planet. pp. 264–265. ISBN 978-1-74104-317-4.
- ↑ Higham, C., 2014, Early Mainland Southeast Asia, Bangkok: River Books Co., Ltd., ISBN 9786167339443
- ↑ Higham, 2001: pp.70-73
- ↑ Higham, 2001: p.73
Bronne
wysig- Chandler, David (1996). A History of Cambodia (4th uitg.). Westview Press. ISBN 978-0-8133-4363-1.
- Coedès, George (1968). Walter F. Vella (red.). The Indianized states of Southeast Asia. trans. Susan Brown Cowing. University of Hawai`i Press. ISBN 978-0-8248-0368-1.
- Higham, Charles (2001). The Civilization of Angkor. Phoenix. ISBN 1-84212-584-2.
- Rooney, Dawn F. (2005). Angkor: Cambodia's wondrous khmer temples (5th uitg.). Odissey. ISBN 978-962-217-727-7.
Eksterne skakels
wysig
Hierdie artikel is vertaal uit die Engelse Wikipedia
