Wikipedia

Jesus in Islam

In Islam is Isa ibn Marjam (Arabies: عيسى بن مريم ʿĪsā ibn Maryām; letterlik Jesus, seun van Maria), of Jesus, die voorlaaste profeet van Allah (God). Hy is al-Masih, Arabies vir "die Messias",[1][2] die Christus,[3] wat gestuur is om ’n gids te wees vir die kinders van Israel met ’n nuwe openbaring: al-Injīl (Arabies vir "die Evangelie").[4] Jesus word as ’n profeet beskou[3] wat nie getroud was en nie kinders gehad het nie. Hy is ’n belangrike figuur[5] wat in 93 verse van die Koran genoem word onder verskeie titels soos "Seun van Maria",[6] die "Gees van God"[7] en die "Woord van God".[7][8]

ʿĪsā
عيسى
Jesus
Islamitiese profeet
Die naam Jesus, seun van Maria in Islamitiese kalligrafie, gevolg deur "Vrede vir Hom".
Die naam Jesus, seun van Maria in Islamitiese kalligrafie, gevolg deur "Vrede vir Hom".
Plaaslike naam  ישוע Yēšūă‘
Gebore  c. 7-2 v.C.
Betlehem, Romeinse Ryk
Verdwyning  c. 30-33
Getsemane, Jerusalem
Voorganger  Yaḥyā (Johannes die Doper)
Opvolger  Mohammed
Familie
Moeder  Maria
Ander  Yaḥyā (Johannes die Doper)
Maria en Jesus (deur Gentile da Fabriano).

Die Koran en die meeste hadit-versamelings noem dat Jesus as ’n "rein seun" (sonder sonde) gebore is vir die maagd Maria,[3][9][10] nes in die Christendom. Daar word geglo Jesus het baie wonderwerke verrig, soos om as baba te praat, verskillende kwale te genees, dooies te laat opstaan en voëls van klei te maak en lewe in hulle te blaas.[11]

Nes alle ander profete in die Islam word Jesus ’n Moslem genoem (dus iemand wat hom onderwerp aan God se wil). Hy word beskou as die voorloper van Mohammed en het voorspel die volgende profeet se naam sou "Ahmad" wees. Islam verwerp die idee dat Jesus goddelik was, of die Seun of beliggaming van God. Volgens sekere vertolkings van die Koran het die kruisiging van Jesus nooit plaasgevind nie.[12] Die meeste Moslems glo Jesus het nie gesterf nie, maar lewend na die hemel opgevaar.[2]

Volgens die Moslem-tradisie sal Jesus om en by met die Oordeelsdag na die aarde terugkeer om geregtigheid te herstel en al-Masih ad-Dadjdjal ("die vals Messias" of "antichris") te verslaan[13][14] – egter nie as ’n nuwe profeet nie, want Mohammed was die laaste profeet.

Geboorte van Jesus

wysig
 
Jesus se stamboom, tot by sy oupagrootjie.

Die verhaal van Jesus se geboorte begin met ’n inleiding wat verskeie kere in die Koran vertel word. Dit beskryf eers die geboorte van Maria en haar diens in die Jerusalem-tempel onder die profeet en priester Sagaria, wat later die pa van Johannes die Doper was. Verskeie Islamitiese historici het deur die eeue besonderhede by die verhaal gevoeg.

Ibn Isjak (oorl. 761 of 767), ’n Arabiese historikus en skrywer van heiligelewens, het ’n weergawe met die naam In die Begin geskryf. Daarin vertel hy kortliks dat Sagaria Maria se voog was. Nadat hy haar nie langer kon onderhou nie, het hy haar aan die timmerman George toevertrou. Terwyl sy in ’n kerk afgesonder was, het ’n jong man met die naam Josef by haar aangesluit en hulle het mekaar met take gehelp. Maria word later as ’n weduwee beskryf, sonder om te noem wie haar man was. Die vertelling van Jesus se geboorte volg die weergawe in die Koran, en voeg by die geboorte was in Betlehem, langs ’n palmboom met ’n krip.[15]

At-Tabari (oorl. 923), ’n Persiese geleerde en historikus, het te vertel gehad afgevaardigdes van die koning van Persië het geskenke aan Jesus gebring (wat ooreenstem met die Bybelse vertelling van die sterrekykers uit die ooste); en dat ’n man met die naam Josef (nie genoem as Maria se man nie) opdrag gekry het om haar en haar kind na Egipte te neem en later na Nasaret terug te keer.[16]

Die werk Die Weivelde van Goud, deur Al-Masoedi (oorl. 956), ’n Arabiese historikus en geograaf, noem dat Jesus op 24 Desember in Betlehem gebore is, ’n feit wat waarskynlik by Christene van destyds gekry is, sonder om die Koran se palmboom te noem.[17]

Ali ibn al-Athir (oorl. 1233), ’n Arabiese of Koerdiese historikus en biograaf, skryf in Die Volledige Geskiedenis, ’n werk wat ’n standaard vir latere Moslems geword het, die timmerman Josef het ’n belangriker rol gespeel, maar hy word nie ’n familielid of man van Maria genoem nie. Al-Athir skryf hoe Jesus as jong seun gehelp het om ’n dief vas te trek, en hoe hy ’n ander seun weer lewend gemaak het nadat Jesus van die seun se moord beskuldig is. Al-Athir het geglo Maria was net ’n uur lank swanger en baseer dit op die vers in die Koran wat lui: "En sy het hom ontvang en met hom na ’n afgeleë plek vertrek" (Koran 19:22).[18]

Die Mariaboodskap

wysig

Die aartsengel Gabriël het die nuus oor die geboorte van Jesus aan die maagd Maria oorgedra. Sy is uit alle vroue van alle nasies uitgesonder en hy het aan haar die blye boodskap van ’n heilige seun gebring.[19]

In ’n hadit deur Aboe Hoeraira, een van die eerste metgeselle van Mohammed, haal hy die profeet aan: Feitlik geen afstammeling van Adam word gebore sonder dat Satan hom op die oomblik van geboorte aanraak nie. ’n Baba wat so aangeraak word, huil. Die enigste uitsonderings is Maria en haar seun.[20]

 
Maria kry iets om te eet uit ’n palmboom, soos in die Koran beskryf word.

Die engel kondig aan dat die seun Jesus, die Messias, genoem moet word, en sê hy sal ’n groot profeet genoem word omdat hy die Gees van God en die Woord van God is wat die Evangelie sal ontvang. Die engel vertel Maria dat die seun as baba sal praat en wanneer hy groot is, ’n metgesel van die mees regverdiges sal wees. Maria, wat vra hoe sy ’n seun kan baar terwyl geen man haar aangeraak het en sy ook nie ontugtig was nie, word vertel:

So sal dit wees. U Heer sê: Dit is maklik vir My; Ons sal hom ’n teken vir die mense maak, en ’n genade van Ons. En dit is ’n beslote saak.

– Koran 19:21

Terwyl sy in pyn verkeer met die bevalling, roep ’n stem na haar:

Moenie treur nie; waarlik, u Heer het ’n stroompie vir u laat ontspring; en trek die stam van die palmboom na u toe; dit sal vars, ryp dadels vir u laat afval. Eet, drink en spoel u oë uit."

– Koran 19:24-26

Toe Maria terug huis toe gaan met die baba, vra mense haar oor die kind uit. Maar Maria het ’n gelofte van stilswye afgelê en wys net na die kind. Toe antwoord Jesus:

Vrede was met my op die dag van my geboorte en sal met my wees op die dag van my afsterwe, en so ook weer op die Dag wanneer ek opgewek sal word.

– Koran 19:33

Jesus wat as baba praat, word in die Koran as een van ses wonderwerke genoem.[21]

Kindertyd

wysig

Die vertelling oor hoe met Jesus van Herodus gevlug is, is min of meer dieselfde as die weergawe in die Bybel. Volgens sommige Islamitiese bronne het Jesus en sy gesin 12 jaar in Egipte deurgebring.[22] Baie morele verhale en wonderwerke tydens Jesus se jeug word genoem in Verhale van die Profete, boeke wat oor die eeue saamgestel is oor pre-Islamitiese profete en helde.[23] Al-Masoedi vertel hoe Jesus as seun die Joodse godsdiens bestudeer en uit die Psalms lees.

Tydens hul verblyf in Egipte word van verskeie wonderwerke vertel: Jesus verduidelik op nege maande Moslemse geloofsbeginsels aan ’n skoolmeester; Jesus onthul diewe aan ’n ryk man; vul leë bottels met iets om te drink; verskaf kos en wyn aan ’n tirannieke koning; bewys aan dieselfde koning sy mag om ’n man uit die dode op te wek; en wek ’n kind op wat per ongeluk doodgemaak is.[24][25]

Jesus as volwassene

wysig
 
Die Jordaanrivier, waar Jesus deur Jahia ibn Zakarijja (Johannes die Doper) gedoop is.

Algemene konsensus bestaan daaroor dat Jesus Aramees, die algemene taal van Judea in die 1ste eeu v.C., gepraat het.[26]

Volgens die meeste Moslem-tradisies voldoen Jesus en sy leringe aan die profetiese model: ’n mens wat nes ander profete op ’n sekere tyd deur God na ’n sekere volk gestuur is om hulle te veroordeel oor die aanbidding van afgode en hulle uit te daag om een ware God te aanbid. Volgens tradisie is Jesus gestuur na die mense van Israel, en sy status as profeet word deur talle wonderwerke bevestig.[27]

Jesus word nie tradisioneel as goddelik beskou nie, maar in die Moslem-ideologie word Jesus ook nie as minder as dit beskou nie; dit sou ontheiligend wees en dieselfde as om ’n ander Islamitiese profeet te misken. Die wonderwerke van Jesus en die titels wat in die Koran aan hom gegee word, dui eerder op die mag van God as die goddelikheid van Jesus – dieselfde mag is agter die boodskap van alle ander profete.[28]

Dood en hemelvaart

wysig

Islamitiese geskrifte ontken die kruisiging en dood van Jesus soos in die Nuwe Testament beskryf.[13] Volgens die Koran wou die mense (die Jode en Romeine) Jesus doodmaak, maar hulle het dit nie gedoen nie, hoewel "dit vir hulle gelyk het asof dit so is". Moslems glo Jesus het nie gesterf nie, maar is deur Allah opgehef tot Homself.

Omdat hulle sê: Ons het die Messias, Jesus, die seun van Maria, die boodskapper van Allah, omgebring – en hulle het hom nie gedood nie, en ook nie tot die dood toe gekruisig nie, maar dit het vir hulle gelyk asof dit so is. En hulle wat hieroor verskil, twyfel voorwaar daaraan. Hulle het geen kennis daaromtrent nie, maar volg slegs ’n vermoede, en hulle het hom beslis nie doodgemaak nie; nee, Allah het hom opgehef tot Homself, en Allah is Almagtig.

– Koran 4:157-158

In ’n bespreking van die geleerdes wat die kruisiging ontken, sê Encyclopaedia of Islam:

Die ontkenning stem ooreen met die logika van die Koran. Die Bybelse verhale wat daarin verskyn (byvoorbeeld Job, Moses, Josef, ens.) en die episodes wat verband hou met die geskiedenis van die begin van Islam, demonstreer dit is "God se praktyk" om geloof te laat seëvier oor die magte van die bose. As Jesus aan die kruis gesterf het, sou dit beteken het sy teregstellers het geseëvier; maar die Koran voer aan hulle het sonder twyfel misluk: "God sal vir seker dié verdedig wat glo."

– XXII, 49

Wederkoms

wysig

Volgens die Islamitiese tradisie sal Jesus se wederkoms geskied te midde van oorloë tussen al-Mahdi (die verlosser van Islam) en al-Masih ad-Dadjdjal (die antichris).[29] Jesus sal oos van Damaskus neerdaal, geklee in geel. Hy sal hom as ’n Moslem neerlê by die Islamitiese leerstellings en by al-Mahdi aansluit. Eindelik sal Jesus die antichris verslaan en almal wat "Mense van die Boek" (Jode en Christene) is, sal in hom glo. Dan sal daar net een gemeenskap wees, dié van Islam.[30]

Ná die dood van al-Mahdi sal Jesus die leierskap oorneem. Dié tydperk word in die Islam verbind met algemene vrede en geregtigheid. Jesus sal sowat 40 jaar lank regeer en dan sterf. Hy sal in die stad Medina langs Mohammed begrawe word.[13]

Verwysings

wysig
  1. ↑ Glassé, Cyril (2001). The new encyclopedia of Islam, with introduction by Huston Smith (Édition révisée. uitg.). Walnut Creek, CA: AltaMira Press. p. 239. ISBN 9780759101906.
  2. ↑ 2,0 2,1 Parrinder, Geoffrey (1996). Jesus in the Quran. Oxford Oneworld. ISBN 1851680942.
  3. ↑ 3,0 3,1 3,2 McDowell, Jim, Josh; Walker, Jim (2002). Understanding Islam and Christianity: Beliefs That Separate Us and How to Talk About Them. Euguen, Oregon: Harvest House Publishers. ISBN 9780736949910.
  4. ↑ The Oxford Dictionary of Islam, p.158
  5. ↑ Schumann, Olaf H. (2002). Jesus the Messiah in Muslim Thought. Dehli: ISPCK/HIM. p. 13. ISBN 8172145225.
  6. ↑ Parrinder, Geoffrey (1965). Jesus in the Quran. Londen: Faber and Feber. p. 18. ISBN 9781851689996.
  7. ↑ 7,0 7,1 Khalidi, Tarif (2001). The Muslim Jesus: Sayings and Stories in Islamic Literature. Londen: Harvard University Press. p. 4. ISBN 0674011155.
  8. ↑ Gregory A. Barker and Stephen E. Gregg, "Jesus Beyond Christianity: The Classic Texts (Oxford: Oxford University Press, 2010), p. 84.
  9. ↑ Robinson, Neal (31 Julie 1991). Christ in Islam and Christianity. New York: State University of New York Press. p. 12. ISBN 0791405591.
  10. ↑ Leirvik 2010, p. 47.
  11. ↑ Klauck, Hans-Josef Klauck (2003). The Apocryphal Gospels: An Introduction. Londen: Bloomsbury T&T Clark. p. 18. ISBN 056708390X.
  12. ↑ Lawson, Todd (1 Maart 2009). The Crucifixion and the Qur'an: A Study in the History of Muslim Thought. Oneworld Publications. ISBN 1851686355.
  13. ↑ 13,0 13,1 13,2 Anawati, G.C. (6 June 2016). "Īsā". Encyclopaedia of Islam (2nd). Ed. P. Bearman. Brill Online. ISBN 9789004161214. URL besoek op 6 June 2016. 
  14. ↑ Encyclopedia of the Quran, Jesus
  15. ↑ Watt 1991, p. 39.
  16. ↑ Watt, William Montgomery (1991). Muslim-Christian Encounters: Perceptions and Misperceptions. Londen en New York: Routledge. p. 46. ISBN 0415054109.
  17. ↑ Watt 1991, p. 46.
  18. ↑ Watt 1991, p. 48-49.
  19. ↑ Khalidi, Tarif (2001). The Muslim Jesus: Sayings and Stories in Islamic Literature. Cambridge, Mass., en Londen: Harvard University Press. pp. 51–94. ISBN 0674004779.
  20. ↑ Tarif Khalidi 2001, p. 51-94, 4.199, Abū Hurayra.
  21. ↑ Zebiri, Kate (Maart 2000). "Contemporary Muslim understanding of the miracles of Jesus". The Muslim World. Hartford Seminary. 90 (1–2): 71–90. doi:10.1111/j.1478-1913.2000.tb03682.x. Besoek op 29 Mei 2016.
  22. ↑ Leirvik 2010, p. 59.
  23. ↑ Leirvik 2010, p. 58, Qisas al-anbiya ("Verhale van die Profete")
  24. ↑ Leirvik, Oddbjørn (27 Mei 2010). Images of Jesus Christ in Islam: 2de uitg. New York: Bloomsbury Publishing. pp. 33–34. ISBN 1441181601.
  25. ↑ Leirvik 2010, p. 59-60.
  26. ↑ "Aramaic". The Eerdmans Bible Dictionary. (1987). Ed. Allen C. Myers. Grand Rapids, MI: William B. Eerdmans. ISBN 0-8028-2402-1. 
  27. ↑ Gregg, Stephen; Barker, Gregory 2010, p. 90
  28. ↑ Gregg, Stephen; Barker, Gregory 2010, p. 83.
  29. ↑ Sonn (2004) p. 209
  30. ↑ Sahih Muslim (in Arabies). p. 193, part2.

Eksterne skakels

wysig


Profete van Islam, soos in die Koran genoem.  
ʾĀdam Iederies Nūḥ Hüd Salih Ibrāhīm Loet Ismāʿīl Iṣḥāq Yāqub Yūsuf Ajjoeb
آدم ادريس نوح هود صالح إبراهيم لوط اسمعيل اسحاق يعقوب يوسف أيوب
Adam Henog Noag Eber Selag Abraham Lot Ismael Isak Jakob Josef Job
Suayb Mūsa Haroen Dhoelkifl Dawud Süleyman Iljas Al-Yasa Yunus Zakarija Jahja ʿĪsā Mohammed
شعيب موسى هارون ذو الكفل داود سليمان إلياس اليسع يونس زكريا يحيى عيسى
 
Mohammed
Jetro Moses Aäron Esegiël Dawid Salomo Elija Elisa Jona Sagaria Johannes Jesus
Ontsluit van "https://af.wikipedia.org/w/index.php?title=Jesus_in_Islam&oldid=2535082"