Johann de Jager

Johann de Jager (*25 November 1938, Bethal –) is ’n Afrikaanse digter. Hy is getroud met die skrywer Lien Roux-de Jager.

Lewe en werk

Herkoms en opleiding

Johannes Jurgens de Jager is op 25 November 1938 op Bethal gebore en word groot op Morgenzon. In 1957 matrikuleer hy aan die Hoër Landbouskool Tweespruit in die Vrystaat. Daarna gaan hy na die Vlootgimnasium vir militêre opleiding, waarna hy ’n ruk boer en dan na die stad verhuis.

Hy voltooi in 1993 die B.A. Honneurs-graad in Skeppende Skryfwerk aan die Departement Afrikaans van die Universiteit van Pretoria. Hy voltooi ook ander skryfslypskole, soos die ATKV skryfskool by die Potchefstroomse Universiteit vir Christelike Hoër Onderwys onder leiding van professor Hans du Plessis. Aan die Pretoria Tegniese Kollege voltooi hy die kursus in Beeldhou.

Bydrae tot Afrikaans

Sedert 1990 gee hy die literêre nuusbrief Komsat uit en later publiseer hy ook die elektroniese nuusbriewe Velletjie en Tjokkervelletjies.

In samewerking met bekende kultuurorganisasies organiseer hy ook verskeie digterskompetisies.

Hy is die uitgewer van talle publikasies, insluitende digbundels, ’n eeufeesbundel vir ’n welsynsorganisasie en hy is betrokke by die produksie van ’n Opvoedkunde Woordeboek in ses dele.

Persoonlike lewe

In 1996 trou hy met die skryfster Lien Roux-de Jager.

Skryfwerk

Digkuns

Sy eerste publikasie is in 1965 in die Belgiese tydskrif Yang Kahier en daarna ook in verskeie ander koerante en tydskrifte in België.

In 1972 word van sy gedigte opgeneem in die versamelbundel Yang 100 Dichters en een van sy gedigte word bekroon met Gedicht van de Week in die bylae van ses dagblaaie.

Sy gedigte en kortkuns word in Tydskrif vir letterkunde, Literator, Contrast en ander publikasies opgeneem, asook in verskeie versamelbundels soos Mooiste Afrikaanse liefdesgedigte, As die son kom oogknip, Vrede sluiten is wegen openen en Gebede vir die landskap.

Bundels

In 1992 debuteer hy met die bundel Tandem waarin sy gedigte saam met die van Lieb Sauermann gepubliseer word. Die bundel word in vier afdelings verdeel, met elke digter wat gedigte bydra tot elke afdeling. Die eerste afdeling is liefdesgedigte onder die titel Eros; Milieu en mens is verse oor die omgewing en samelewing, met enkele gestalteverse; Interpolêr is aktuele verse oor tydgenootlike Suid-Afrika met Ikabod toekomsverse.

Ander skryfwerk

Vir die tydskrif Kakkerlak skryf hy verskeie resensies en van sy verhale verskyn op LitNet.

Publikasies

Jaar	Publikasies
1992	Tandem (saam met Lieb Sauermann)

Bronnelys

Internet

• LitNet: http://www.litnet.co.za/author/johann-de-jager/
• Springbokboeke: http://www.springbokboeke.co.za/html/skrywers.html#D

Ongepubliseerde dokumente

• De Jager, Johann Lewenskets Nasionale Afrikaanse Letterkundige Museum en Navorsingsentrum (NALN) Bloemfontein