Pongolapoortdam
Die Pongolapoortdam, vroeër bekend as die Josinidam, is 'n dam geleë in die Pongolarivier in 'n nou kloof in die Lebomboberge, KwaZulu-Natal, Suid-Afrika. Daar is in 1963 met konstruksie begin en die dam is gedurende 1972 voltooi. Die dam het 'n bakmaat van 2 492 miljoen m3 agter 'n wal wat 89 m hoog en 515 m lank is. Die dam voer 'n besproeiingskanaalstelsel op die Makatinivlakte onder die dam. Die N2 nasionale pad gaan digby die dam verby.
| Pongolapoortdam | |
|---|---|
 | |
| Amptelike naam | Pongolapoortdam |
| Ander naam | Josinidam |
| Ligging | KwaZulu-Natal |
| Provinsie/Land | Suid-Afrika |
| Koördinate | 27°24′08″S 31°57′31″O / 27.40222°S 31.95861°O |
| Dam in | Pongolarivier |
| Doel | Besproeiing |
| Konstruksie begin | 1963 |
| Openingsdatum | 1972 |
| Eienaar | Departement van Waterwese |
| Soort dam | Boogdam |
| Hoogte van wal | 89 m |
| Lengte van wal | 515 m |
| Bakmaat | 2 492 miljoen m3 |
Dit lê gedeeltelik in Eswatini (Swaziland) se grondgebied, en gevolglik is 'n ooreenkoms in dié verband met die buurstaat aangegaan. Die dam, wat deel uitmaak van die Pongolapoort-staatswaterskema en in 1973 teen 'n koste van ongeveer R16 miljoen voltooi is, stel besproeiingswater aan die Makatinivlakte en Eswatini beskikbaar.
Produkte wat onder besproeiing verbou kan word, is onder meer suikerriet, lusern, koffie en piesangs. Die dam het 'n dubbelboogbetonwal met 'n kruinlengte van 515 m en 'n hoogte van 89 m. Die opvanggebied beslaan 7 831 km2 en die inhoudsvermoë is ongeveer 2 500 miljoen m3.
'n Sluis is in die linkerkant van die damwal aangebring en 'n dubbelbaanpad is bo-or die wal gebou. Vanweë die warm, subtropiese klimaat van die omgewing moes 'n reuse verkoelingsinstallasie tydens die konstruksie van die dam opgerig word sodat die betonmengsel met ys afgekoel kon word ten einde aan die konstruksievereistes te voldoen.
Die kanaal vertak op die regteroewer van die Pongola en voer water al langs die rivier en aan die linkeroewer van die Mkuzerivier af. Die hoofkanaal is 4,6 m diep en is ongeveer 16,8 m in deursnee aan die boonste gedeelte van die stelsel, en sowat 9,8 m in deursnee aan die onderste gedeelte daarvan.
Sien ook
wysigBronne
wysig- Wêreldspektrum, 1982, ISBN 0908409648, volume 23, bl. 47
- Ensiklopedie van Suidelike Afrika, Eric Rosenthal. 1967
- Op Pad in Suid-Afrika, B.P.J. Erasmus. 1995 Bl 147 ISBN 1-86842-026-4