Kaapse Veldartillerie

Die Kaapse Veldartillerie is 'n artillerieregiment in die reserwemag (voorheen burgermag) van die Suid-Afrikaanse Leër. Dit is in 1857 gestig, en het aan verskeie koloniale veldslae, die Tweede Vryheidsoorlog, die Eerste Wêreldoorlog, die Tweede Wêreldoorlog, die Grensoorlog, en die Noodtoestand deelgeneem.

Kaapse Veldartillerie
Gestig	26 Augustus 1857
Land	Suid-Afrika
Weermagdeel	Suid-Afrikaanse Nasionale Weermag‎
Tipe	Reserwe artillerie
Spesialisasie	Veldartillerie
Hoofkwartier	Fort iKapa
Aantal lede	een lugaanval bataljon en een opleidingsvleuel
Mars	Bonny Dundee

Geskiedenis (Chronologie)

1850's

• Gestig in Kaapstad in 1857 as 'n vrywilligereenheid genaamd 'Cape Town Artillery'.

1860's

• Na 'n parade ter ere van Prins Alfred in 1867 word die eenheid 'Prince Alfred's own Volunteer Artillery' genoem.

1870's

• 9de Grensoorlog teen die Xhosa in die Transkei (1877-78).
• Noordelike Grensoorlog teen die Korana langs die Oranjerivier (1878-79)
• Transkei-veldtog in die Transkei (1880-81).

1890's

• Naam verander na 'Prince Alfred's Own Cape Artillery' in 1896
• Betsjoeanaland-veldtog in die Langberg (Noord-Kaap) (1897).
• Tweede Vryheidsoorlog (1899-1902).

1900's

• Naam verander na 'Prince Alfred's Own Cape Field Artillery' in 1903.
• Ontvang 'n Koningsvaandel in 1905 ter erkenning aan sy diens in die Tweede Vryheidsoorlog - 'n seldsame eer vir 'n artillerieenheid.

1910's

• In 1913 by die Burgermag van die nuwe Unie Verdedigingsmagte as die '6de Burgerbattery (Prince Alfred's Own Cape Field Artillery)' ingelyf.
• 1914 Rebellie.
• Duits-Suidwes-Afrika-veldtog (1914-15).

1920's

• Hernommer tot '1ste Burgerbattery' in 1926.

1930's

• Herdoop tot 'Cape Field Artillery (Prince Alfred's Own)' in 1932.
• Herorganiseer as '1st Field Brigade (CFA)' wanneer die Tweede Wêreldoorlog in 1939 uitbreek.
• Oos-Afrika-veldtog (1940-41).

1940's

• Noord-Afrika-veldtog (1941-42).
• Naam verander na '1st Field Regiment (CFA)' in 1941.
• Italiaanse veldtog (1945).

1950's

• Word amptelik 'n tweetalige eenheid wanneer die burgermag in 1954 volgens taal herorganiseer is - die Afrikaanse naam is '1 Veldregiment (Kaapse Veldartillerie)'.
• Die regiment vier sy eeufees in 1957.
• Naam verander na 'Regiment Tygerberg (KVA)' in 1960.

1960's

• Naam verander na 'Kaapse Veldartillerie' in 1963.
• Ontvang die Vryheid van Toegang tot die Stad Kaapstad.

1970's

• Angola-veldtog (1975-76).
• Grensoorlog (1966-89): verskeie operasionele diensbeurte in noordelike Suidwes-Afrika en suidelike Angola.

1980's

• Noodtoestand (1985-90): verskeie keer vir binnelandse veiligheidsdienste opgeroep.

1990's

• Toe die burgermag na 1994 in die reserwemag omskep is word die KVA 'n reserwemageenheid.

2000's

• Die regiment vier sy 150ste bestaansjaar in 2007.

Gevegsonderskeidings

Gewoonlik word gevegsonderskeidings nie aan artillerieeenhede toegeken nie, maar 'n uitsondering is gemaak vir die Eerste Wêreldoorlog, en die KVA pronk dus met die onderskeiding 'Suidwes-Afrika 1914-15'.

Sien ook

• Cape Town Highlanders
• Cape Town Rifles (Dukes)
• Natal Field Artillery
• Transvaal Horse Artillery

Verwysings

• Crook, L.A. (1994). 71 Motorised Brigade.
• Orpen, N.D. (1965). Gunners of the Cape.