Kapichira-waterval

Die Kapichira-waterval is in die Shirerivier in Malawi.

Ligging

Hierdie waterval in die Majete-wildernisgebied is 19 km noord van Chikwawa en suidwes van Blantyre. Dit lê 200 m bo seespieël en by die koördinate 15° 54′ 2.1″ suid en 34° 45′ 3.12″ oos.

Waterval

Die Kapichira-val is stroomaf die laaste groot waterval in die Shiré-rivier. 'n Twee honderd meter oos van die waterval is 'n reuse-hidroëlektrisiteitssentrale. David Livingstone en sy geselskap het in 1859 tot hier gevorder. Hul medereisiger Richard Thornton se graf is nog by Maganga te sien. Toeriste besoek die omgewing vir die besondere natuurskoon.

Verwarring

In die 80 km tussen Matope en Chikwawa verloor die Shiré-rivier 384 m aan hoogte. In die deel gaan dit oor verskeie katarakte en watervalle en deur verskeie klowe. In publikasies heers daar aansienlike verwarring oor watter naam by watter waterval hoort. Stroomaf is die bekendstes die Kholombidzo-waterval, Nkula-waterval (15° 31′ 20.78″ suid, 34° 48′ 59″ oos), Tedzani-waterval (15° 33′ 27.14″ suid, 34° 47′ 14.64″ oos), Mpatamanga-kloof, Hamilton-waterval (15° 51′ 0.86″ suid, 34° 43′ 25.79″ oos) en dan die Kapichira-waterval. Die Kholombidzo-waterval word ook soms die Murchison-waterval genoem. Dit skep verwarring met die gelyknamige waterval in die Nyl. So ook staan die Kapichira-waterval ook as die Murchison-katarak en as die Livingstone-waterval bekend. Daar is ook 'n Livingstone-waterval in die Kongorivier. Boonop word die Kholombidzo- en die Kapichira-watervalle soms met mekaar verwar. In die Engelstalige Wikipedia word die naam van die laasgenoemde waterval verkeerdelik as Kapachira Falls geskryf.

Bibliografie

britannica.com
mapcarta.com
mindat.org
mw.geoview.info