Kaprivistrook
Die Kaprivistrook is 'n 30 km breë strook land in Afrika tussen Angola en Botswana wat aan Namibië behoort. Sedert 1990 val die Kaprivistrook in twee Namibiese streke: die westelike helfte lê in die Kawangostreek, terwyl die oostelike helfte in die Sambesistreek is. Die strook begin in die noordooste van die land op die 21ste graad oosterlengte en strek 450 km na die ooste tot die punt waar die Choberivier van die Zambezirivier aftak. Die strook grens in die noorde aan Angola en Zambië en in die suide aan Botswana. Die Okavangorivier vloei deur die westelike deel van die Kaprivistrook.
GeskiedenisWysig
Die Kaprivistrook is na die Duitse kanselier Leo von Caprivi vernoem. Von Caprivi het die gebied in 1890 by Duits-Wes-Afrika gevoeg in 'n ruiltransaksie met die Verenigde Koninkryk. Dit het Duitsland toegang tot die Zambezirivier en 'n roete na Suid-Afrika se ooskus, waar die Duitse kolonie Tanganjika geleë was, gegee. Die oordrag was 'n deel van die Helgoland-Zanzibar-Verdrag, waarvolgens Duitsland sy belang in Zanzibar geruil het vir die Kaprivistrook en die Helgoland eiland in die Noordsee.
Namibië en Botswana het 'n langdurige geskil oor die suidelike grens van die Kaprivistrook na die Internasionale Hof van Justisie geneem. Die kern van die gebiedsgeskil gaan oor die eienaarskap van die Choberivier. Die uitkoms van die geskil sou bepaal of 'n groot eiland, bekend as Kasikili (Namibië) of Seddudu (Botswana) onderskeidelik, in Namibië se nasionale grondgebied val. Die regering van Botswana beskou die eiland as 'n integrale deel van die Chobe Nasionale Park. Daarenteen beskou die Namibiese regering en baie inwoners van die Kaprivistrook die eiland as deel van die oorspronklike Duits-Britse ooreenkoms. Geslagte van die Kaprivistrook se inwoners het dit vir seisoenale weiding, rietinsameling en as 'n begraafplaas gebruik. In Desember 1999 het die Internasionale Hof van Justisie beslis dat die belangrikste deel van die Choberivier en daarom die internasionale grens, na die noorde van die eiland lê, en dat die eiland deel vorm van Botswana.
Nasionale ParkeWysig
Die Kaprivistrook bestaan tans grotendeels uit natuurparke:
- Die klein Popa Falls Park is by die ‘watervalle’ van Popa in die Okavangorivier (#8 op kaart).
- Die 204 km lang gedeelte tussen die Okavango- en Kwandoriviere vorm die Bwabwata Wildpark en die Mahango Wildpark (#9 op kaart).
- Die Mudumu Nasionale Park is langs die Kwandorivier (#10 op kaart).
- Die moerasagtige en deurgaans moeilik begaanbare Mamili Nasionale Park is geleë tussen die Kwando- en Linyantiriviere (#11 op kaart).