Karelsgraf

Karelsgraf is 'n wit graf 40 km van Carnarvon af langs die R386-pad na Prieska. Dit is 'n stille getuie van die avontuurlustige en bandelose lewe wat sommige mense meer as 200 jaar gelede op die grense van die Kaapkolonie gevoer het.

Carel en Jacob Kruger is in die Roggeveld gebore en het daar opgegroei. In 1776 word Carel aangestel as veldkornet in die Klein-Roggeveld. Die broers het 'n besondere meganiese aanleg gehad. Hierdie vaardigheid wend hulle toe aan om ryksdaalders te druk wat lyk soos dié wat die VOC aan die Kaap gebruik. Daarmee koop hulle in Kaapstad onder andere vuurwapens en messe. Hulle word gearresteer, ontsnap egter en verdwyn oor die noordgrens van die Kaapkolonie. Langs die Oranjerivier voer hulle 'n bestaan as grootwildjagters. In 1791 word Carel doodgetrap deur 'n olifant wat kort tevore deur hom gekwes is.

BibliografieWysig

  • Green, Lawrence G.: Karoo. The story of the Karoos of South Africa – the Great Karoo, the Little Karoo and the far corners of the North West Cape and Namaqualand. Kaapstad: Howard Timmins, 1955.
  • Human, Eben: Buite se 100 puik plekke. In: Die Burger, 5 November 2013.