Karoopoort
Karoopoort was tot laat in die 19de eeu 'n belangrike bergpas op die pad na die binneland van Suid-Afrika. Dit lê in ‘n kloof in die Witteberge tussen die Warm Bokkeveld en die Tankwa Karoo.
| Karoopoort | |
| Ligging | Tussen die Warm Bokkeveld en die Tankwa Karoo |
|---|---|
| Oppervlak | Grond |
| In | Witteberge |
Karoopoort is op ‘n grondpad wat noordwaarts wegdraai uit die R46 wat Ceres en Touwsrivier verbind. Dit is geleë in ‘n nou kloof tussen die Kwarrieberg en Saalberg, aan die noordekant van die Warm Bokkeveld. Die Doringrivier vloei noordwaarts deur die kloof. Aan die noordekant van Karoopoort vurk die pad in die R355 na Calvinia en die R356 na Sutherland. Die R355 gaan verby die Tankwa Karoo Nasionale Park.
Die roete is van historiese belang omdat dit deel was van die eerste pad van Kaapstad na die noorde. Reeds in die 18de eeu was daar ‘n uitspanning vir poskoetse en togryers en trekboere met hul ossewaens. Ontdekkingreisigers en plantkundiges soos Carl Peter Thunberg, Masson, Francois le Vaillant, Lichtenstein, Burchell en De Mist het beskrywings van die roete nagelaat. Veral tydens en na die ontdekking van diamante was daar baie verkeer deur die poort.
Toe die spoorlyn in die 1870’s na die binneland oor Worcester gebou is, het die verkeer deur Karoopoort begin afneem. In 1925 was daar sprake dat die beplande N1-hoofweg die roete sou volg. Daarvan is afgesien ten gunste van die roete wat die spoorlyn volg.
Vandag word die pad gebruik deur boere en toeriste. Die pad en rivier kronkel deur die kloof onder enorme rotse van gekronkelde lae rooi sandsteen. Kareebome, wilgers en verskeie ander plante kom voor. Die uitspanning en huis (gebou 1850) is in 1981 tot nasionale gedenkwaardigheid verklaar. Na bewering is die vyeboomlaning by die huis die langste in die wêreld. Twee hoogspanningslyne loop deur die poort.
Lees ook wysig
Bibliografie wysig
- www.afrikaner.co.za
- Mossop, E.E.: Old Cape Highways. Kaapstad: Maskew Miller, ongedateerd