Daar is talle ou geboue in die Kazanse Kremlin, waarvan die Mariaboodskap-katedraal (1554-'62) die oudste is. Soos baie Kazanse geboue uit dié tydperk is dit van plaaslike sandsteen gebou in plaas van stene. Die katedraal is ná die Russiese Rewolusie van 1917 van die Ortodokse Christene weggeneem. Die kloktoring is in vyf vlakke gebou om soos die Iwan die Grote-kloktoring in Moskou te lyk, maar is in 1930 deur die Kommuniste afgebreek.
Die katedraal is ’n paar jaar gelede gerestoureer. Op 21 Julie 2005, op die feesdag van die heilige ikoon Ons Dame van Kazan, is ’n replika van die langverlore ikoon in die teenwoordigheid van 10 000 pelgrims in die pas gerestoureerde katedraal geplaas.
Die opvallendste baken van die kremlin is die skewe Söyembikä-toring, wat moontlik uit die tyd van Pieter die Grote dateer.
Nog ’n maklik herkenbare baken is die Spasskaja-toring, die hoofingang tot die kompleks. Die toring is genoem na die Spasski-klooster wat daarnaby geleë was. Van die klooster se kerke was die Kerk van Sint Nikolaas (1560's) en die Katedraal van die Verheerliking van die Verlosser (1590's), wat albei tydens Josef Stalin se bewind deur die Kommuniste verwoes is.
Ook van belang is die sneeuwit torings en mure wat in die 16de en 17de eeu gebou maar later gerestoureer is; die Qol-Şärif-moskee wat onlangs in die kremlin herbou is; en die Goewermentshuis (1843-'53) wat nou die Paleis van die President van Tatarstan is. Laasgenoemde staan vermoedelik op die terrein van die eertydse paleis van die khans. Tussen die paleis en Söyembikä-toring is die paleiskerk wat op die fondament van ’n Middeleeuse moskee gebou is.
Die Qol-Şärif-moskee, die grootste moskee in Europa, is op 24 Junie 2005 ingewy. Sowat 17 000 mense, onder andere afgevaardigdes van 40 lande, het dit bygewoon.
Aan die noordemuur van die Kremlin is nog ’n toring met ’n ingang – die Geheime Toring. Dit word so genoem omdat dit voorheen ’n geheime watertoevoerput gehuisves het. Dit bied ook aan voetgangers toegang tot die Kremlin.
Rusland
