Kiepersol-pouoogmot

Die Kiepersol-pouoogmot (Bunaea alcinoe) is 'n mot in die familie Saturniidae wat in Afrika voorkom. Hoewel dit baie na 'n skoenlapper lyk, is dit 'n mot. Op die onderste twee vlerke is twee groot kolle wat soos oë lyk. Hierdie "oë" dien as afskrikmiddel vir hulle vyande. Hulle het 'n groot reeks gasheerplante, wat die kiepersol, essenhout, witstinkhout, laventelkoorsbessie (Croton-spp.) en Bauhinia-spp. insluit.

Kiepersol pouoogmot
Wetenskaplike klassifikasie
Koninkryk:	Animalia
Filum:	Arthropoda
Klas:	Insecta
Orde:	Lepidoptera
Familie:	Saturniidae
Genus:	Bunaea
Spesie:	B. alcinoe
Binomiale naam
Bunaea alcinoe (Stoll, 1780)

Metamorfose

Die mot het 'n lewensduur van drie tot vyf dae waartydens eiers gelê word. Uit die eiers broei dik vernielsugtige ruspes wat voor die voet skade aan plante aanrig. Hierdie ruspes is ongeveer 70 mm lank en 15 mm in deursnee. In Januarie/Februarie verlaat die ruspes die plant en oorwinter as papies onder die grond. Die volwassenes (motte) verskyn in die lente na die eerste goeie reëns en lê dan eiers op die gasheerplant en sit die siklus so voort. Hulle gaan deur een so 'n siklus per jaar.

Galery

Larwes van die Bunaea alcinoe op 'n boskiepersol.

Eiers van die Bunaea alcinoe op 'n boskiepersol.

Sien ook

• Alfabetiese lys van Suid-Afrikaanse vlinders

Eksterne skakels

• Wikimedia Commons het meer media in die kategorie Kiepersol-pouoogmot.
• Wikispecies het meer inligting verwant aan Kiepersol-pouoogmot