Killarney, Johannesburg
Killarney is 'n voorstad van Johannesburg, Suid-Afrika. Dit is in Johannesburg se E-streek geleë as een van die welvarende rustige groen voorstede in die noorde van die Goudstad. Ander welgestelde residensiële buurte in sy omgewing sluit Saxonwold, Houghton, Norwood en Oaklands in.
Killarney | |
|---|---|
  Killarney Killarney se ligging in Gauteng | |
| Koördinate: 26°9′57″S 28°3′11″O / 26.16583°S 28.05306°O | |
| Land |  Suid-Afrika |
| Provinsie | Gauteng |
| Munisipaliteit | Stad Johannesburg |
| Oppervlak | |
| • Totaal | 0,42 km2 (0,16 vk. myl) |
| Bevolking (2011)[1] | |
| • Totaal | 5 203 |
| • Digtheid | 12 388/km2 (32 080/vk. myl) |
| Rasverdeling (2011) | |
| • Wit mense | 31.4% |
| • Indiërs/Asiërs | 26.6% |
| • Bruin mense | 2.3% |
| • Swart mense | 35.2% |
| • Ander | 4.6% |
| Taal (2011) | |
| • Engels | 61.7% |
| • Zoeloe | 6.8% |
| • Afrikaans | 5.7% |
| • Tswana | 5.2% |
| • Ander | 20.6% |
| Skakelkode | 011 |
In Killarney, wat vroeër tradisioneel baie lede van Johannesburg se Joodse gemeenskap gehuisves het, het 'n aantal groot eiendomme ontstaan waarvan sommige tans as konsulate dien, maar ook groot woonstelgeboue met Art Deco-stylelemente. Tans voel jong stedelike beroepslui uit alle etniese groepe aangetrokke deur die rustige atmosfeer en die nabyheid van besige stadsdele soos Parktown, Braamfontein, Rosebank en Sandton.[2]
Geskiedenis
wysig
Oorspronklik het die gebied deel uitgemaak van die uitgestrekte plaas Braamfontein. Die oostelike seksie is deur die Houghton Estate Gold Mining Company in 1899 aan William Cook, 'n Ierse immigrant, verkoop wat dit, volgens Naomi en Reuben Muskier se historiese woordeboek A Concise Historical Dictionary of Greater Johannesburg na Killarney, 'n nedersetting in die suidweste van Ierland, genoem het – die geboorteplek van sy vrou Jessie Olive Scrooby.[3]
In 1905 het die Amerikaanse entrepreneur en finansier Isadore William Schlesinger, wat in 1877 in New York in 'n Oostenryks-Joodse immigrantegesin gebore is en hom in 1894 in Suid-Afrika gevestig het,[4] die plaas gekoop. Volgens Anna Smith se boek Johannesburg Street Names het Schlesinger se onderneming, African Realty Trust, die destydse Killarney Township in 1908 met 'n unieke beskrywing bemark waarvolgens dit bestaan het uit “a garden, an orchard, a vineyard, an orangery, a shrubbery, a pinery, a paradise, a picture spot, a health resort, a townships and a home”.
Schlesinger het 'n verskeidenheid ondernemings gevestig, waaronder die African Theatres and Film Trusts, en 'n rolprentateljee bekend as die Killarney Film Studios in Killarney laat bou. Hier is onder meer die gewilde nuusfilmreeks African Mirror en dokumentêre vollengte-rolprente soos The Symbol of Sacrifice, wat die Zulu-oorlog in 1879 behandel het, vervaardig. In die tydperk tussen 1916 en 1922 het Schlesinger se filmmaatskappy 43 rolprente vervaardig. In die 1930's het die eerste klankrolprente ontstaan, net soos advertensie-films en Suid-Afrika se eerste toeriste-rolprent.
In 1924 het Schlesinger vir hom 'n herehuis in die koloniale styl met drie verdiepings laat bou wat hy Whitehall genoem het. Sy privaat woning was op die tweede verdieping geleë, terwyl die res van die gebou as kantoorruimte gedien het. Whitehall is later omskep in 'n luukse woonstelgebou. Schlesinger is in 1949 oorlede. 'n Dekade later het sy seun, John, die rolprentateljee aan die Amerikaanse 20th Century Fox verkoop.
Verwysings
wysig- ↑ 1,0 1,1 1,2 1,3 "Subplek Killarney". Sensus 2011.
- ↑ www.sa-venues.com: About Killarney. Besoek op 27 Julie 2017
- ↑ City of Johannesburg, 18 Januarie 2012: Killarney is stylish living. Besoek op 27 Julie 2017[dooie skakel]
- ↑ www.encyclopedia.com: Schlesinger, Isidore William. Besoek op 27 Julie 2017