Rosebank, Johannesburg

Vir Rosebank in Kaapstad, sien Rosebank, Kaapstad.

Rosebank is 'n residensiële en kommersiële voorstad in die noordelike deel van Johannesburg. Dis aangelê op die plaas Braamfontein. 'n Aantal sakeondernemings het hul hoofkwartier in Rosebank se sakekern, terwyl ook luukse winkelsentrums, hotelle, opelugrestaurante, rolprentteaters, nagklubs, kunsgalerye en vlooimarkte bydra tot dié voorstad se kosmopolitiese karakter.

Rosebank
Voorstad
'n Hotel in Rosebank, Johannesburg
Rosebank  Rosebank se ligging in Gauteng
Koördinate: 26°8′43″S 28°2′26″O
Land	Suid-Afrika
Provinsie	Gauteng
Munisipaliteit	Stad Johannesburg
Oppervlak
• Totaal	0,82 km2 (0,32 vk. myl)
Bevolking  (2011)
• Totaal	1 085
• Digtheid	1 323/km2 (3 430/vk. myl)
Rasverdeling (2011)
• Wit mense	36.6%
• Indiërs/Asiërs	6.5%
• Bruin mense	4.7%
• Swart mense	48.7%
• Ander	3.5%
Taal (2011)
• Engels	56.3%
• Zoeloe	11.9%
• Afrikaans	7.4%
• Tswana	5.0%
• Ander	19.4%
Poskode (strate)	2196
Skakelkode	011

Onlangse ontwikkeling

Rosebank het van ongeveer 1999 tot 2002 'n groot opknapping ondergaan, met die uitgebreide herontwikkeling van beide die Rosebank Mall en The Zone @Rosebank wat 'n hoë-end kleinhandel- en inkopievoorsiener geskep het. Plaaslike owerhede het ook die nodus as 'n prioriteitsontwikkelingsarea vir verbeterde dienslewering en infrastruktuur geïdentifiseer. Gevolglik het die voorstad na raming die afgelope jare 'n kapitaalinspuiting van R7 miljard beleef.

Rosebank word 'n toenemend gewilde bestemming vir korporatiewe maatskappye. Die stygende vraag na kantoorruimte het meegebring dat huurgeld in die voorstad met 9% in 2016 toegeneem het, die sterkste groei wat in enige Johannesburgse kantoornodus aangeteken is.

Bekende ondernemings

Verskeie luukse winkelsentrums maak dit 'n gewilde kuierplek en inkopiebestemming vir jong professionele persone, bekendes, ontwerpers en die gay gemeenskap. Rosebank het 'n florerende naglewe met kafees, kroeë en klubs rondom die ontwerpdistrik soos Marble Restaurant, Molokai, Capital Cafe, The Bank en Sumo Nightclub. Die African Craft Market, en die gewilde Rooftop Market ("Rosebank Flea Market") is gewilde toeristebestemmings; verskeie luukse hotelle is ook in die voorstad geleë. Die jaarlikse Joburg gay-trots-parade gaan ook deur die strate van Rosebank en gaan dan na die Dieretuinmeer.

Gautrein

'n Ondergrondse stasie vir die Gautrein is in Rosebank in gebruik geneem op 2 Augustus 2011.