Die Ku Klux Klan (ook soms Klu Klux Klan, Klan of KKK genoem) was die benaming van 'n aantal geheime blanke organisasies in die Verenigde State van Amerika. Hierdie organisasies het 'n homogene Amerikaanse bevolking voorgestaan en het bekend geraak vir hulle rassistiese geweld teen anderskleuriges.

Die Ku Klux Klan se kenteken.

Beginjare wysig

 
Lede van die Ku Klux Klan masjeer in 1928 in Pennsylvania Avenue in Washington, D.C.

Die eerste KKK-beweging van die 1860's het 'n gewelddadige rol teen Afro-Amerikaners in die Suide van Amerika tydens die land se Rekonstruksie Era gespeel. Dit is gestig in reaksie op die afskaffing van slawerny aan die einde van die Amerikaanse Burgeroorlog. Lede het hulle eie wit kostuums, mantels, maskers, en keëlvormige hoede gemaak om vrees in te boesem en hulle eie identiteit te verdoesel. Die beweging het egter teen die laat 1860's doodgeloop.

Tweede beweging wysig

 
Die KKK verbrand 'n kruis.

Die tweede beweging was 'n omstrede landswye organisasie in die 1920's. Hulle het die meeste van die gebruike en tradisies van die eerste beweging behou. Enige wit man van protestantse oortuigings kon daarby aansluit. Hulle het standaard wit kostuums gebruik wat hulle ontvang het as hulle by die organisasie aansluit. Hierdie beweging was bekend vir hulle massa parades en die brand van kruise.

Derde beweging wysig

Die derde beweging ontstaan na afloop van die Tweede Wêreldoorlog in verset teen die Amerikaanse Beweging vir Burgerregte. In 1954 besluit die Amerikaanse Hooggeregshof dat dit ongrondwetlik is om kinders op grond van ras toegang tot sekere skole te weier. Na die uitspraak het verskeie onafhanklike KKK-groepe aanvalle op Afro-Amerikaners uitgevoer.

In die somer van 1964 het Edgar Killen drie Afro-Amerikaners wat aan die Amerikaanse Beweging vir Burgerregte deelgeneem het vermoor. Hy word egter in 1967 deur 'n blanke jurie vrygespreek. In 1988 word 'n rolprent genaamd Mississippi Burning oor die gebeure vrygestel. Hy is in 2005 herverhoor (teen die tyd was hy reeds 80 jaar oud) en vir 160 jaar gevangenisstraf gevonnis.

Tans bestaan die KKK uit klein onbeduidende groepies wat nog die naam gebruik, maar geen werklike invloed uitoefen nie. Na raming het die KKK in 2012 tussen 5 000 en 8 000 lede gehad.[1]

Verwysings wysig

  1. "Ku Klux Klan" (in Engels). Southern Poverty Law Center. Geargiveer vanaf die oorspronklike op 5 Julie 2015. Besoek op 7 Februarie 2013.

Eksterne skakels wysig