LGBT-regte in Bhoetan
Moontlike tronkstraf staar lesbiërs, gays, biseksuele en transgenders (LGBT-mense) in Bhoetan in die gesig. Homoseksualiteit is onwettig in die land. Seksdade tussen mense van dieselfde geslag (al is dit met wedersydse toestemming en in privaatheid) is strafbaar met ’n tronkvonnis van tussen ’n maand en korter as ’n jaar.[1]
Min geweld of vervolging kom voor,[2] hoewel baie Bhoetanese onbewus is daarvan dat LGBT-mense bestaan. Namate Bhoetan meer aan die buitewêreld blootgestel word, het LGBT-mense uit die kas begin kom en sigbare bymekaarkomplekke gevestig. Gevolglik is houdings onder die algemene publiek aan die verander.[3]
Sommige lede van Bhoetan se parlement het in die openbaar ’n beroep gedoen dat die wette verander word.[4] Op die oomblik is daar geen wettige erkenning van selfdegeslagpaartjies nie.
Lewensomstandighede
wysigOnkunde oor homoseksualiteit is algemeen weens stereotipes in die kultuur.[5] Die Bhoetanese het nie die Westerse idee van homo- en heteroseksualiteit nie. Daar is al na hulle verwys as ’n openlik biseksuele gemeenskap, maar dit word betwis.[6]
Meer vroue as mans maak hul seksuele oriëntasie bekend.[7] Daar is kulturele en tradisionele struikelblokke vir mense wat aanvaarding soek.[7] Volgens ’n studie van 2016 het meer as 42% van die land se transgender vroue en 23% van die gay en biseksuele mans al meer as een keer probeer selfmoord pleeg.[8]
Boeddhisme, die land se hoofgodsdiens, veroordeel nie homoseksualiteit nie. In 2015 het Dzongsar Khyentse Rinpoche, die mees vooraanstaande Boeddhiste-onderwyser, gesê seksuele oriëntasie het niks te doen met wie verligting bereik en wie nie. Hy het verder gesê Bhoetanese moenie net gay mense verdra nie, maar hulle repekteer.[9]
Die Bhutan Observer, een van die land se weekblaaie, het ’n aansienlike aantal artikels oor LGBT-kwessies geskryf wat heelwat reaksie ontlok het – in so ’n mate dat dit die artikels is waarop die meeste kommentaar gelewer word op die koerant se webtuiste.[10] Die regeringgesteunde koerant Kuensel het intussen na gays as die "derde geslag" verwys in ’n artikel waarin MIV-programme vir gay mans bespreek is.[11]
Die Internasionale Dag teen Homofobie, Transfobie en Bifobie is in 2016 die eerste keer in Bhoetan gehou. Die Verenigde Nasies se kantore in die land het ’n videoveldtog geloods om die regte van LGBT-mense te verdedig[12] en die Bhoetanese Kuen-Nyam-party het hul steun vir LGBT-regte uitgespreek.[13]
’n Selfdegeslagpaartjie wat in 2018 hul verhouding openbaar gemaak het, het gesê hul familie en vriende aanvaar hulle ten volle.[14]
Openbare mening
wysigEen van die eerste peilings in Bhoetan, in 2013, oor homoseksualiteit het die volgende resultate opgelewer: Altesaam 60% van die respondente het geglo homoseksualiteit is immoreel en 40% het gemeen dit moet aanvaar word en dat gays beskerm moet word teen diskriminasie en gevaar. Daar was egter net 150 deelnemers en almal was van dieselfde gebied – die geldigheid van die peiling is dus nie ’n weerspieëling van die hele bevolking se mening nie.[5]
Verwysings
wysig- ↑ State-sponsored Homophobia A world survey of laws prohibiting same sex activity between consenting adultsGeargiveer 17 Oktober 2012 op Wayback Machine
- ↑ "Bhutan's first openly gay couple get nothing but love from the public". Geargiveer vanaf die oorspronklike op 21 Maart 2019. Besoek op 24 September 2018.
- ↑ Gay in Nirvana: Bhutan’s LGBT Population Emerges from the Shadows
- ↑ "Bhutan lawmaker says law criminalizing gays may go". Geargiveer vanaf die oorspronklike op 7 Junie 2019. Besoek op 24 September 2018.
- ↑ 5,0 5,1 "Bhutan's underground gay community seeks acceptance" (in Engels). Geargiveer vanaf die oorspronklike op 14 Februarie 2020. Besoek op 31 Desember 2014.
- ↑ Bhutan, Asia
- ↑ 7,0 7,1 "More equal or less equal?". Geargiveer vanaf die oorspronklike op 31 Desember 2014. Besoek op 31 Desember 2014.
- ↑ Amid Widespread Stigma and Harassment, Bhutan’s LGBT Community Seeks Acceptance
- ↑ To Be, or Not to Be, in Bhutan
- ↑ Wangmo, Phuntsho (19 Desember 2008). "How Gay Are Bhutanese Gays?". Bhutan Observer aanlyn. Geargiveer vanaf die oorspronklike op 17 Mei 2017. Besoek op 14 April 2017.
- ↑ Pelden, Sonam (28 November 2011). "Healthcare for the third gender". Kuensel aanlyn. Besoek op 28 November 2011.[dooie skakel]
- ↑ Welcome to IDAHOT Newbies !
- ↑ BKP pledges an inclusive government
- ↑ Bhutan’s first public Gay couple receive positive responses after coming out