Langberge
bergreeks in Suid-Afrika
Die Langberge is ‘n bergreeks in die Noord-Kaap.
Hierdie reeks is tussen nagenoeg 27° 30′ en 29 suid en 22° 30′ en 23° oos, d.w.s. van ongeveer Groblershoop en Boegoeberg op die Oranjerivier noordooswaarts en dan verder noord verby Olifantshoek na die omgewing van Hotazel. Dit vorm die wesgrens van die Ghaapse plato waarop die dorpe Postmasburg en Reivilo sowel as die Asbesberge en die Kurumanheuwels geleë is. Die Sishen-Saldanha-spoorlyn loop wes van die reeks en die Postmasburg-Sishen-spoorlyn ten ooste van die berge.
Die reeks bereik ‘n hoogte van 1900 meter bo seespieël. Tussen die Bergenaarspadpas en die Padkloofpas is die Witsand-natuurreservaat.
Let Wel: Moenie hierdie bergreeks verwar met die Langeberge van die Wes-Kaap nie.