Len Taunyane

Len Taunyane ([lɪn tauˈɲanɪ] 1880's – na 1904) was 'n Suid-Afrikaanse baan- en veldatleet wat aan die Olimpiese Somerspele 1904 aan die mansmaraton deelgeneem het, en was dus een van die eerste twee swart Afrikane wat aan die moderne Olimpiese Spele deelgeneem het.

Len Taunyane

Vroeë lewe

Taunyane was 'n lid van die Tswanavolk en 'n veteraan van die Tweede Vryheidsoorlog, nadat hy as 'n boodskapper gedien het. 'n Foto wat tussen 1900 en 1902 geneem is, wys hom as 'n krygsgevangene op Sint Helena. Min is andersins oor sy lewe bekend. Taunyane was moontlik ook 'n student aan die Universiteit van die Vrystaat. Hy het in 1904 na die VSA gereis om aan die Boereoorlog-tentoonstelling by die St. Louis Wêreldtentoonstelling te verskyn. Daar het hy twee keer per dag deelgeneem aan heruitvoerings van die Slag van Colenso en die Slag van Paardeberg.

Taunyane (tweede van links) as krygsgevangene op Sint Helena, ongeveer 1900.

1904-maraton

Die 1904-maraton was 'n grootliks informele byeenkoms, wat op 'n ongeskikte baan en oor paaie so stowwerig gehardloop is dat dit baie van die atlete laat neerval het. Taunyane het op die nippertjie as 'n Zoeloe (hy was 'n Tswana nie 'n Zoeloe nie) vir die wedloop ingeskryf en het dus nie formeel Suid-Afrika verteenwoordig nie wat eers in 1910 as Unie van Suid-Afrika tot stand gekom het. Daar is na hom verwys as "Len Tau" of "Lentauw" deur amptenare wat nie sy naam kon uitspreek nie.

Taunyane het waarskynlik kaalvoet gehardloop en in die negende plek uit 'n veld van 32 en 14 geëindig. Dit was 'n teleurstelling, aangesien baie waarnemers seker was dat Taunyane beter kon gedoen het as hy nie byna 'n myl van koers af gejaag is deur aggressiewe honde nie.

Saam met Jan Mashiani was Taunyane een van die eerste twee swart Afrikane wat aan die moderne Olimpiese Spele deelgeneem het.

Niks is van Taunyane se latere lewe bekend nie.