Leon de Stadler

Leon de Stadler is ’n taalkundige en professor in Afrikaanse taalkunde aan die Universiteit van Stellenbosch.

Lewe en werk

Leon George de Stadler is in 1953 gebore. Hy studeer aan die Universiteit Stellenbosch en behaal hier in 1977 die M.A.-graad en in 1983 die D.Litt.-graad met ’n proefskrif Oor die struktuur van die naamwoordstuk in Afrikaans. By sy alma mater is hy vanaf 1976 as junior lektor, later as senior lektor en vanaf 1993 as professor werksaam in die Departement Afrikaans-Nederlands, waar hy in Taalkunde spesialiseer. Hy was ook ’n direkteur van die Stellenbosch Taalsentrum en professor in Dokumentontwerp. In hierdie hoedanigheid speel hy ’n belangrike rol met die vasstel van die universiteit se taalbeleid. Hy was direkteur van SAGUS, ’n aktiewe lid van die Taalkommissie en ’n stigsterslid van die nasionale Spesiale Belangstellingsgroep oor Veeltaligheid in hoër onderwys. By die Katholieke Universiteit van Nijmegen in Nederland is hy buitengewone professor en gee hier lesings vir ’n maand in elke jaar. Sy professionele lidmaatskappe sluit in die Linguistics Society of Southern Africa, die Suid-Afrikaanse Akademie vir Wetenskap en Kuns en die International Comparative Literature Association. Hy is getroud met Amanda, ook ’n taalkundige.

Skryfwerk

Saam met Johan Combrink skryf hy die handboek oor Afrikaanse fonologie en op sy eie is hy verantwoordelik vir Afrikaanse semantiek. Woordkeusegids (’n kerntesourus) skryf hy saam met Pieter Harteveld en D.C. Hauptfleisch en saam met sy vrou Amanda stel hy die Groot tesourus van Afrikaans saam, wat later bygewerk word tot die Tesourus van Afrikaans. Wetenskaplik skryf is ’n handleiding. As hoof van die taalsentrum versorg hy verskeie publikasies oor taalgebruik, insluitende Issues in document design, Making your documents work, Van teksskema tot samehangende teks, So bereik jy jou leser en Paragrawe wat sin maak.

Benewens sy vakkundige boeke publiseer hy ook etlike artikels in vakkundige tydskrifte en lewer bydraes tot ander boeke, insluitende Syntagmatic lexical relations: a lexicographical perspective, The dative and its counterparts en Sintaksis op die voorgrond. As samesteller is hy saam met Christoph Eyrich verantwoordelik vir Issues in cognitive linguistics: 1993 proceedings of the International Cognitive Linguistics Conference, waarin referate wat op hierdie konferensie gelewer is, saamgebundel is.

Publikasies

1987 – Afrikaanse fonologie (saam met J.G.H. Combrink)

1989 – Afrikaanse semantiek

1992 – Woordkeusegids (saam met P. Harteveld en D.C. Hauptfleisch)

1994 – Groot tesourus van Afrikaans (saam met Amanda de Stadler)

2004 – Wetenskaplik skryf

2005

• Issues in document design

• Making your documents work (saam met E. Basson en L. Luttig)

• Paragrawe wat sin maak

2006

• Van teksskema tot samehangende teks

• So bereik jy jou leser

2007 – Tesourus van Afrikaans

Samsteller

1999

• Issues in cognitive linguistics: 1993 proceedings of the International
• Cognitive Linguistics Conference (saam met Christoph Eyrich)

Bronnelys

Internet

• Icelda: http://icelda.sun.ac.za/index.php/representatives/17-staff-staff/17-Leon-de-Stadler^{[dooie skakel]}
• SA Human Sciences Research Networking Directory: http://files.eric.ed.gov/fulltext/ED423185.pdf
• Stellenbosch Writers: http://www.stellenboschwriters.com/destadler.html
• Worldcat: http://www.worldcat.org/search?q=au%3ADe+Stadler%2C+L.+G.&qt=hot_author