Liezl de Kock

Liezl de Kock is ’n aktrise en skrywer van fisieke teaterstukke, waarvan “Piet se optelgoed” die bekendste is.

Lewe en werk

Liezl de Kock studeer vanaf 2001 aan die Filmskool Afda, waar sy in 2005 ’n B.A.-graad in verhoog- en rolprentkuns en skryf ontvang. Vanaf Mei 2006 tot Desember 2011 is sy verbonde aan die onafhanklike teatergroep FTH:K, wat spesialiseer in visuele en fisieke teater wat taalgrense oorskry en veral van mimiek, kostuums en teater-rekwisiete gebruik maak om die boodskap aan die gehoor te kommunikeer.  Vanaf Januarie 2012 tot Desember 2012 is sy verbonde aan die Oos-Kaapse teatergroep Ubom! Daarna deurloop sy vanaf Januarie 2013 ’n meestersgraadkursus in Drama aan Rhodes Universiteit in Grahamstad. Sy behaal in 2014 die M.A.-graad met lof met ’n prakties gedrewe navorsingsverslag onder die titel “Piet se optelgoed”.  As akteur tree sy in verskeie produksies op. In 2005 wen sy ’n beste aktrise-toekenning vir haar rol in die rolprent “Hollywood in my huis”, in 2008 kry sy ’n Arts and Culture-toekenning vir “Gumbo 2008”, terwyl haar spel in die fisieke teaterstuk “Pictures of you” aan haar ’n Ovation-toekenning en twee Fleur du Cap-toekennings besorg. Sy word ook genomineer vir beste aktrise vir haar rol in Rob Murray se “Womb tide”. In 2010 word sy in die Sunday Times vermeld as een van die beste aktrises in Suid-Afrika. Sy bly in Lady Grey in die Oos-Kaap.

Skryfwerk

“Piet se optelgoed” is ’n fisieke teaterstuk met ’n Afrikaanse titel, maar dit bevat nie gesproke taal nie. Piet woon aan die rand van die stad. Hy is ’n mite en ’n gruwelstorie wat aan ongehoorsame kinders vertel word. Die stuk verken die magteloosheid van vroue en is ’n donker nagmerrie met onverwagse humor, maar ook hartverskeurende kwesbaarheid en menslikheid. “Piet se optelgoed” word in 2014 by die Nasionale Kunstefees op Grahamstad opgevoer, waar dit ’n silwer-Standard Bank Ovation-prys in die kategorie vir fisieke teater ontvang het. Dit word ook gekies om in 2015 na die Amsterdam Randfees te gaan.

Bronnelys

Tydskrifte en koerante

• Anoniem “‘Nagmerrie’ sonder taal” “Beeld” 13 Augustus 2015

Internet

• Conspiracy of clowns: https://conspiracyofclowns.wordpress.com/category/piet-se-optelgoed/
• LinkedIn: https://za.linkedin.com/pub/liezl-de-kock/64/48a/55b^{[dooie skakel]}